Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 291 Hüküm no: 299 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hassa hasekilerinden Ahmed Ağa ile Fatma bt. Abdullah ve Habibe bt. Abdullah’ın müşterek oldukları evi Mustafa Beşe’ye satmaları Mübâya‘a-i arsa Mahmiye-i İslâmbol’da Hocapaşa kurbünde Karaki mahallesinde sâkin Hâssa hasekilerinden Ahmed Ağa b. Mehmed nâm kimesne kendi nefsinden asîl ve Fatıma bt. Abdullah ve Habibe bt. Abdullah nâm hatunlar taraflarından husûs-ı âti’l-beyânda vekîlleri olduğu zât-ı mezbûretânı ârifân Hüseyin Efendi b. İbrahim ve Molla Ali b. Halil nâm kimesneler şehâdetleriyle şer‘an sâbit olmağla mezbûr Ahmed Ağa vekâleten meclis-i şer‘-i şerîf-i enverde Lağımcıbaşı işbu bâ‘isü’l-vesîka Mustafa Beşe b. Halil nâm kimesne mahzarında bi’l-asâle ve bi’l-vekâle ikrâr ve takrîr-i kelâm [edip] mahmiye-i mezbûrede Seydihalîfe mahallesinde vâki‘ bir tarafdan es-Seyyid Hasan Efendi’nin menzil arsası ve iki tarafdan tarîk-i hâs ve bir tarafdan tarîk-i âm ile mahdûd derûnunda dört bi’r-i mâ ve bir harâb hamam ve bir su hazînesi ve sâir enkāz-ı mevcûde-i ma‘lûmeyi hâvî bir bâb muhterik mülk menzil arsasının dört sehm i‘tibârıyla iki sehmi müvekkilem mezbûre Fatıma Hatun’un ve bir sehmi müvekkilem mezbûre Habibe Hatun’un ve bir sehmi benim bâ-hüccet-i şer‘iye şirâen yedimizde mülk ve hakkımız olmağın ben arsa-i mahdûd-ı mezkûreyi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mustafa Beşe’ye bi’l-asâle ve bi’l-vekâle bin beş yüz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr bin beş yüz guruşu mezbûr Mustafa Beşe yedinden bi’l-asâle ve bi’l-vekâle tamamen ahz ü kabz eyledim, ba‘de’l-yevm arsa-i mahdûde-i mezkûre mezbûr Mustafa Beşe’nin mülk-i müşterâsı ve hakk-ı sarfı olup benim ve müvekkilelerim mezbûretân Fatıma ve Habibe hatunların kat‘a alâka ve medhalimiz kalmamışdır dedikde gıbbe’t-tasdîki’ş-şer‘î mâ-vaka‘a. Fî 22 Ra sene 1197 Şühûdü’l-hâl: Es-Seyyid Ahmed Beşe b. Osman, Ahmed Beşe b. Ahmed, Lağımcı Musa Beşe b. Mehmed, Hüseyin Beşe b. Ebîbekir, Molla Salih b. Halil.