Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 296 Hüküm no: 305 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Habibe bt. Ömer’in kocasından boşanması Muhâla‘a Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı vech-i şer‘î üzere mu‘arrefe olan Habibe bt. Ömer nâm hatun meclis-i şer‘-i şerîf-i enverde zevc-i dâhili işbu bâ‘isü’l-vesîka Mehmed Emin Beşe b. el-Hâc Mehmed nâm kimesne mahzarında ikrâr ve takrîr-i kelâm edip mezbûr Mehmed Emin Beşe zevcim olup lâkin beynimizde hüsn-i zindegânemiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan otuz iki [guruş] mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed Emin Beşe ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mütâlebâtdan ben zevcim mezbûr Mehmed Emin Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 25 Ra sene 1197 Şühûdü’l-hâl: Hafız Mehmed Said Efendi b. el-Hâc Ali Serlevha-i yemîn-i Mısr, Mehmed Emin Efendi b. Ahmed, Mehmed Sadık Efendi b. Mehmed Said, İmâm Ömer Efendi b. Mehmed, Molla Ali b. Halil, Hasan Ağa b. ( ), Abbas Ağa, Yusuf Ağa Kapıkethudâsı, Harbeci Ahmed Beşe.