Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 296 Hüküm no: 306 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Habibe bt. Ömer’in bakmakta olduğu küçük kızı için boşandığı kocasından nafaka alması Nafaka-i sagīre Kezâlik mu‘arrefe olan işbu bâ‘isetü’l-kitâb Habibe bt. Ömer nâm hatun meclis-i şer‘-i şerîf-i enverde zevc-i muhâlı‘ı Mehmed Emin Beşe b. el-Hâc Mehmed mahzarında takrîr-i kelâm ve bast-ı merâm edip zevc-i muhâlı‘ım mezbûr Mehmed Emin Beşe’nin firâşından hâsıla ve benden [mütevellide] ve bi’l-hakkı’l-hıdâne hâlâ hacr u terbiyemde olan sadriye kızım Nefise nâm sagīrenin nafaka ve kisveye ihtiyâcı olmağla kızım sagīre-i mezbûrenin nafaka ve kisve-bahâsı içün babası mezbûr üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i muvakkı‘-ı sadr-ı kitâb -tûbâ-lehû ve hüsnü-meâb- efendi hazretleri dahi sagīre-i mezbûrenin ber-vech-i muharrer nafaka ve kisve-bahâsı içün babası mezbûr Mehmed Emin Beşe üzerine bi’t-terâzî târih-i kitâbdan küllü yevm dörder para farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisvesine harc u sarfa ve lede’l-iktizâ istidâneye ve inde’z-zafer babası mezbûr Mehmed Emin Beşe üzerine rücû‘a mezbûre Habibe Hatun’a izin verdiğinden sonra mukırre-i mezbûre Habibe Hatun yine meclis-i şer‘de zevc-i muhâlı‘ı mezbûr Mehmed Emin Beşe mahzarında i‘âde-i kelâm edip kızım sagīre-i mezbûrenin nafaka-i mukaddere-i mefrûzasından olmak üzere târih-i kitâbdan on aylık otuz guruş nafakayı ber-vech-i peşîn zevc-i muhâlı‘ım mezbûr Mehmed Emin Beşe yedinden ahz ü kabz eyledim dedikde gıbbe’t-tasdîki’ş-şer‘î. Fî 25 Ra sene 1197 Şühûdü’l-hâl: Şâhidûn-ı sâbıkūn.