Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 297 Hüküm no: 307 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeş mahallesinden Emine bt. Ahmed’in kocasından boşanması Muhâla‘a Mahmiye-i İslâmbol’da Mevlevîhâne Yenikapısı dâhilinde Sîmkeş mahallesinde sâkine ve zâtı vech-i şer‘î üzere mu‘arrefe olan Emine bt. Ahmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb es-Seyyid Mustafa b. Mustafa nâm kimesne mahzarında ikrâr ve takrîr-i kelâm edip mezbûr es-Seyyid Mustafa zevcim olup lâkin beynimizde hüsn-i mu‘âşeretimiz olmamağla zimmetinde mütekarrer ve ma‘kūdun-aleyh olan on guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr es-Seyyid Mustafa ile muhâla‘a-i sahîha-i şer‘iye ile hul‘ olduğumda ol dahi hul‘-ı mezbûru ba‘de’l-kabûl hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevcim mezbûr es-Seyyid Mustafa’nın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîk. Fî 25 Ra sene 1197 Şühûdü’l-hâl: Es-Seyyid Molla Ahmed b. Mahmud, Ahmed Ağa b. ( ), Molla Ali b. Halil, Salih b. Halil, Mustafa b. Mustafa Muhzır.