Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 298 Hüküm no: 308 Orijinal metin no: [44a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Melek Hatun mahallesinden Şerife Emetullah’ın kendisini boşayan kocasından haklarını alarak zimmetini ibra etmesi Tatlîk Mahmiye-i İslâmbol’da Mevlevîhâne Yenikapısı dâhilinde Melek Hatun mahallesinde sâkine ve zâtı vech-i şer‘î üzere mu‘arrefe olan Şerife Emetullah bt. Mustafa nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb Mehmed Said Beşe b. Mustafa nâm kimesne mahzarında ikrâr ve takrîr-i kelâm edip mezbûr Mehmed Said Beşe zevc-i dâhilim olduğu hâlde târih-i kitâb günü beni bâyinen tatlîk etmekle zimmetinde ma‘kūdun-aleyh olan otuz guruş mehr-i müeccelim ile nafaka-i iddet-i mu‘ayyene ve meûnet-i süknâm içün bi’t-terâzî beynimizde ta‘yîn olunan yedi guruş ki cem‘an otuz yedi guruşu zevc-i mutallıkım mezbûr Mehmed Said Beşe bana def‘ ü teslîm eyledikde ben dahi yedinden tamamen ahz ü kabz edip hukūk-ı zevciyete müte‘allika âmme-i de‘âvî ve kâffe-i mutâlebâtdan ben zevc-i mutallıkım mezbûr Mehmed Said Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip herbirimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 27 Ra sene 1197 Şühûdü’l-hâl: Es-Seyyid Mustafa Efendi İmâm, İbrahim Efendi b. eş-Şeyh Osman İmâm, es-Seyyid Ubeydullah b. el-Hâc Mehmed, Ali Çavuş Ağa b. ( ), Molla Ali b. Halil.