Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 230 Hüküm no: 184 Orijinal metin no: [51a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebubekir b. Mehmed’in dut bahçesi ve tarla davasında anlaşma sağlandığı Ma‘rûz, Anadolu’da Kocaeli sancağında Yalakâbâd kazâsına tâbi‘ Dere karyesi ahâlîsinden sâhib-i arzuhâl es-Seyyid Ebubekir b. el-müteveffâ es-Seyyid Mehmed nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde yine karye-i mezbûre ahâlîsinden derûn-ı arzuhâlde mezkûrü’l-ism el-Hâc Mahmud Ağa b. İbrahim nâm kimesne muvâcehesinde karye-i merkūme hudûdu dâhilinde vâki‘ bir tarafdan mezbûr el-Hâc Mahmud Ağa’nın dut bahçesi ve bir tarafdan su yolu ve bir tarafdan tarîk-i âm ile mahdûd müsellesü’ş-şekl bir kıt‘a ve yine karye-i mezbûre hudûdu dâhilinde kâin etrâf-ı erba‘ası tarîk-i âm ile mahdûd bir kıt‘a ki cem‘an iki kıt‘a dut bahçeleri babam müteveffâ-yı merkūm es-Seyyid Mehmed’in hayatında ile’l-vefât yedinde mülkü ve karye-i mezbûre hâricinde Viranbağlar nâm mahâlde vâki‘ etrâf-ı erba‘ası mezbûr Mahmud Ağa tarlası ve bend ve tarîk-i âm ile mahdûd üç şinik tohum istî‘âb eder bir kıt‘a tarla dahi kezâlik müstakıllen taht-ı tasarrufunda olup bin iki yüz otuz üç senesi hilâlinde fevt oldukda zikr olunan iki kıt‘a dut bahçeleriyle tarla-yı mezkûr ancak bana mevrûs ve intikāl etmiş iken ben târîh-i mezkûrda sagīr bulunmamla mezbûr es-Seyyid el-Hâc Mahmud Ağa zikirleri sebkat eden bahçeler ile bir kıt‘a tarlayı târîh-i mezkûrdan beri fuzûlî zabt birle bahçe-i mezkûrların mahsûlâtını ahz ve istihlâk ve tarla-yı mezkûru hırâset ve zirâ‘at edip ancak mezbûr el-Hâc Mahmud Ağa bu def‘a zikr olunan iki kıt‘a dut bahçeleriyle tarla-yı mezkûrdan keff-i yed birle her birini mahâllinde bana teslîme müte‘ahhid oldukdan sonra bahçe-i mezkûrun müddet-i mezkûrede mahsûlât-ı müstehlekeleriyle arz-ı mezkûrun noksân kıymetini mezbûr el-Hâc Mahmud Ağa’dan tazmîn taleb ederim deyü tasaddî eylediğim da‘vâmdan mezbûr Mahmud Ağa ile bi’t-tav‘ ve’r-rızâ yedi yüz guruş üzerine sulh olduğumda ol dahi sulh-ı mezkûru kabûl ve bedel-i sulh-ı mezkûr yedi yüz guruşu çend rûz zarfında bana edâya müte‘ahhid olmağla bedel-i sulh-ı mezkûrdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik deyü mukırr-ı mezbûr es-Seyyid Ebubekir’in bi’l-cümle takrîr-i meşrûhunu mezbûr el-Hâc Mahmud Ağa’nın tasdîk eylediği huzûr-ı [âlîlerine i‘lâm olundu]. Fî 26 S sene [12]57.