Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 231 Hüküm no: 185 Orijinal metin no: [51b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un yanında bulunan ve boşandığı eşinden olan küçük kızı Zübeyde için nafaka tahsis olunması Ma‘rûz, Derûn-ı arzuhâlde mezkûretü’l-ism mu‘arrefetü’z-zât Hadice Hatun bt. Abdullah Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede mahsûs meclis-i şer‘de sâhib-i arzuhâl Abdullah Ağa b. el-Hâc Ali nâm kimesne muvâcehesinde mezbûr Abdullah Ağa ile mukaddemâ zevciyyet beynimizde kāime iken mezbûrun firâşından hâsıla ve benden mütevellide ve bi-hakkı’l-hıdâne hâlâ hacr ve terbiyemde olan bir yaşında sulbiye kızı Şerife Zübeyde nâm sagīrin aslâ malı olmayıp ol vechile nafaka ve kisveye eşedd-i ihtiyâc ile muhtâce olmağla sagīre-i mezbûrenin nafakası için babası mezbûr üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde ol dahi ba‘de’t-tasdîk sagīr-i mezbûrenin nafakası için babası mezbûr üzerine işbu târîh-i i‘lâmdan beher şehr otuz guruş farz ve takdîr olunup meblağ-ı mefrûz-ı mezkûru sagīre-i mezkûrenin nafaka ve kisve ve sâir levâzım-ı zarûriyesine harc ü sarfa ve lede’l-iktizâ istidâneye ve inde’z-zafer babası mezbûr üzerine rücû‘a vâlidesi ve hâdinesi merkūme Hadice Hatun’a kıbel-i şer‘den izin verildiği huzûr-ı âlîlerine i‘lâm olundu. El-emru li-men-lehü’l-emr. Fî 19 S sene [12]57.