Adalar Mahkemesi 1 Numaralı Sicil (H. 1178-1184 / M. 1764-1771) cilt: 75, sayfa: 103 Hüküm no: 108 Orijinal metin no: [25b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fazlullah Paşa Evkafı’ndan Pendik mukataasının mütevellisi İbrahim Ağa ile ortağı Ömer Yazıcı arasındaki hesabın görüldüğü Derûn-ı temessükde olan Ömer Yazıcı tasrîh olunduğu vech üzere müşterekinden hüsn-i rızâsıyla azl ve fesh-i şirket edüp Mütevellî İbrahim Efendi’nin vekîli kayınpederi Halil Efendi’ye temessükünü redd ü def‘ edüp birbirlerinde bir akçe ve bir habbe alacak hakları olmadığı bu mahâlle şerh verildi. Fî 29 Muharrem sene [1]182 [Şuhûdü’l-hâl:] Voyvoda Süleyman Ağa, Voyvoda Ahmed Ağa, Ahmed Efendi, Arnavud Ali Beşe, Helvacı İbrahim Beşe, Serdâr Ahmed Ağa. Pendik mütevellîsi İbrahim Ağa’nın vekîli ve kayınpederi Halil Efendi iltimâsıyla karye-i mezbûredeki ecnebisinden mahlûl vâki‘ olur ise merkūm Ömer Yazıcı mühürlemeyüp ve mühürlerse dahi amel olunmamak üzere bu mahâlle kaydolundu. Vech-i tahrîr-i hurûf oldur ki Evlâdiyet [ve] meşrûtiyet üzere mütevellîsi olduğum Gekbûze kasabasında vâki‘ ceddim merhûm Gāzî Fazlullah Paşa Evkāfı mukāta‘alarından Adalar nâhiyesine tâbi‘ Pendik mukāta‘ası işbu bin yüz seksen bir senesi Martı ibtidâsından sene-i mezbûr Şubat’ı gāyetine gelinceye değin bir sene zabt u rabt eylemek üzere sene-i sâbıkı olan bin sekiz yüz guruş mâl-ı vakfı tamâmen mukāta‘a-i mezkûrdan tarafımıza teslîm olundukdan sonra taraf-ı vakfdan ber-vech-i emânet olmak üzere iltizâmımda olmağla işbu sene-i mübârekde mukāta‘a-i mezkûrdan hâsıl olan a‘şâr-ı şer‘iye ve cürm ü cinâyet ve vâki‘ olan mahlûlden ve her ne olur ise olsun işbu hâfızı’t-temessük Ömer Yazıcıyla sene-i mezbûr tamâmında hesâb olundukda iktizâ eden mâl-ı vakf olan bin sekiz yüz guruş edâ olundukdan sonra fâizi olan akçeyi kendümüzün olup bir akçesi mezbûr Ömer Yazıcı’nın olmak üzere <> ve iki akçesi kendümün olmak üzere merkūm ile beynimizde bu vech üzere ta‘ahhüd olduğunu müş‘ir işbu temessük tahrîr [ve] yedine vaz‘ olunmuşdur. Fî 8 Şa‘bân sene [1]181 Bende İbrahim ber-vech-i meşrûtiyet mütevellî hâlâ