Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 233 Hüküm no: 187 Orijinal metin no: [52a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mutlakoğlu Mehmed Emin’in Voyvoda Ali Ağa aleyhindeki alacak iddiasının reddedilmesi Ma‘rûz, Anadolu’da Yalvaç kazâsı ahâlîsinden sâhib-i arzuhâl Mutlakoğlu es-Seyyid Hafız Mehmed Emin b. es-Seyyid Halil Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde mukaddemâ kazâ-i mezbûr voyvodası derûn-ı arzuhâlde mezkûrü’l-ism es-Seyyid Ali Ağa b. es-Seyyid Mehmed muvâcehesinde mezbûr es-Seyyid Ali Ağa bin iki yüz elli üç senesi hilâlinde kazâ-i mezbûr voyvodası iken Isparta sancağı vâlisi devletlü Hasan Paşa hazretleri tarafından vürûd eden emirnâme-i sâmî mûcebince gāib ani’l-beled mübâşir ta‘yîn olunan Hasan Gavvâs nâm kimesneye terfîkan beni zikr olunan Isparta kazâsına irsâl eylediği hînde ben esnâ-i râhda gerek menzil kirâlarına ve gerek me’kûlât ve meşrûbâtça malımdan harc ü sarf eylediğim bin guruş ve mübâşir-i gāib-i merkūm Hasan Gavvâs’ın ücret-i mübâşiriye nâmıyla bi-gayr-ı hakkın malımdan ahzeylediği bin beş yüz guruş ki cem‘an iki bin beş yüz guruşu mücerred merkūm es-Seyyid Ali Ağa ber-mûceb-i emirnâme-i mezkûreyni sâlifü’z-zikr Isparta kazâsına mübâşir gāib-i merkūma terfîkan irsâl eylediğine mebnî bana malından zâmin olsun deyü takrîr-i meşrûhu üzere tasaddî eylediği da‘vâsı mesmû‘a ve iltifâta şâyân olmadığı müdde‘î-i merkūm es-Seyyid Hafız Mehmed’e tefhîm ve da‘vâ-yı mezkûresiyle bî-vech-i şer‘î merkūm es-Seyyid Ali Ağa’ya mu‘ârazadan men‘ olunduğu huzûr-ı [âlîlerine i‘lâm olundu]. Fî 2 Ra sene 1257.