Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 236 Hüküm no: 189 Orijinal metin no: [52b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Parçacı Agob’a olan borcunu ödemesi için Kürkçü Mıhtar’a tenbih olunması Ma‘rûz, Şifâhen sâdır olan fermân-ı âlîlerine imtisâlen arzuhâl eden Parçacı Agob v. Artin nâm zimmî Perşembe günü huzûr-ı hazret-i fetvâ-penâhîde ma‘kūd meclis-i şer‘-i hatîrde medîne-i Üsküdar’da Selami mahallesinde mütemekkin derûn-ı arzuhâlde mastûrü’l-ism Kürkçü Mıhtar v. Gabril nâm zimmî muvâcehesinde Keseci Kerupa v. Serope nâm zimmî hâzır olduğu hâlde ben sene-i sâbıkā Recebi’l-ferdinin üçüncü günü hâzır-ı mersûm Kerupa zimmî zimmetinde semen-i mebî‘den alacak hakkım olan üç bin beş yüz guruşu hâzır-ı mersûmdan kabz ve bana teslîme tarafımdan mesfûr Mıhtar zimmîyi tevkîl eylediğimde ba‘de kabûlü’l-vekâle meblağ-ı mezkûrun iki bin altı yüz kırk guruşunu mukaddemâ ve sekiz yüz altmış guruşunu dahi bu def‘a ki cem‘an üç bin beş yüz guruşu hâzır-ı mersûmdan bi’l-vekâle tamâmen kabz ve bana vermeyip yedinde kalmağla meblağ-ı mezkûr üç bin beş yüz guruşu bana teslîme mersûm Mıhtar zimmîye tenbîh olunmak matlûbumdur deyü da‘vâ etdikde ol dahi cevâbında benim müdde‘î-i mesfûr Agob zimmî zimmetinde sene-i mezkûre Cemâziyelûlâsı’nın üçüncü günü İstanbul’da Çarşı-yı kebîrde Üçmusluk nâm mahâlde vâki‘ gāib ani’l-meclis Asador zimmînin çukacı mağazasında malımdan ve yedimden iktirâz ve kabz eylediği üç bin beş yüz guruş alacak hakkım olmağla deyn-i mezkûruyla beni ol mikdâr medyûnu işbu hâzır-ı mersûm Kerupa zimmî üzerine üçümüz bir meclisde hâzır olduğumuz hâlde havâle-i mukayyede-i sahîha-i şer‘iyye ile havâle ve [her] birimiz havâle-i mezkûreyi kabûl eylediğimizden sonra meblağ-ı mezkûr üç bin beş yüz guruşu hâzır-ı mersûm Kerupa zimmîden havâleten kabz etmiş idim deyü hâzır-ı mersûmun tasdîkiyle mesfûr Agob zimmînin inkârına mukārin eylediği def‘ine ikāmet-i beyyine edemeyip bi’t-taleb mersûm Agob zimmîye bi’l-muvâcehe ber-nehc-i şer‘î yemîn verilmeğin mûcebince dâfi‘-i mesfûr Mıhtar zimmî def‘-i mezkûruyla mersûm Agob zimmîye bilâ-beyyine mu‘ârazadan ba‘de’l-men‘ mersûm Mıhtar zimmînin sâlifü’l-beyân ikrârıyla lâzım gelen meblağ-ı mezkûr üç bin beş yüz guruşu müdde‘î-i mesfûr Agob zimmîye edâ ve teslîme mesfûr Mıhtar zimmîye tenbîh olunduğu huzûr-ı [âlîlerine i‘lâm olundu]. Fî 15 M sene [12]57.