Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 237 Hüküm no: 190 Orijinal metin no: [53a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil b. Salih’e vefat eden dedesinin tımarından hisse verilmesi Ma‘rûz, Sâdır olan fermân-ı âlîlerine imtisâlen arzuhâl ve hâmişinde mastûr derkenâr ve cebelüyân evkāf ve emlâk mukāta‘ası ümenâsının arzlarına nazar olundukda Kocaeli sancağında Yalakâbâd nâhiyesinde Dere nâm karye ve gayrıdan dört bin altı yüz akçe eşkincilü mülk timârdan yedi yüz altmış altı akçe hisseye bundan akdem mutasarrıf olan Mehmed v. Hüseyin’in fevtinden oğulları İbrahim ve Salih’e ber-vech-i iştirâk tevcîh olunmak iktizâ eder iken merkūm İbrahim karındaşı Salih ketm ederek hisse-i mezkûru tamâmen üzerine tevcîh etdirmiş, ba‘dehu merkūm İbrahim’in fevtinden oğlu Mehmed Ali’ye tevcîh olunmuş olduğu derkenârdan ve merkūm Salih hissesini karındaşı merkūm İbrahim’den taleb üzere iken sâhib-i arzuhâl sulbî oğlu Halil’i terk ederek vefât etmiş ve ol vechile merkūm Halil mağdûr ve dedesi nân pâresinden dûr olunduğundan bahisle timâr-ı mezkûrun nısf hissesi ammizâdesi merkūm Mehmed Ali’nin ref‘inden dedesi merkūm Mehmed’in mahlûlünden kendüye tevcîhini mezbûr Halil istid‘â eylediği arzuhâli meâli ve meclis-i şer‘de takrîrinden nümâyân ve fi’l-hakīka merkūm Halil müteveffâ-yı mezbûr Mehmed’in sulbî sahîh oğlu Salih’in oğlu olduğu ehl-i vukūf bî-garaz Müslimînden karye-i mezbûre ahâlîsinden Mehmed Ağa b. el-Hâc İbrahim ve İbrahim Hayreddin Efendi b. Mehmed ve Ebubekir Ağa b. Mehmed nâm kimesnelerin haberleriyle zâhir olmağla timâr-ı mezbûrun nısfı vech-i meşrûh üzere mezbûr Mehmed Ali’nin ref‘inden dedesi merkūm Mehmed’in mahlûlünden sâhib-i arzuhâl merkūm Halil’e tevcîhi menût-ı re’y-i âlî idüğü huzûr-ı âlîlerine i‘lâm olundu. Fî 20 Ra sene [12]57.