Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 237 Hüküm no: 191 Orijinal metin no: [53a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcunu ödemesi hususunda Mahmud b. Abdullah’a tenbih olunması Ma‘rûz, Medîne-i Üsküdar’a muzâfe Çengel karyesinde sâkine sâhibe-i arzuhâl mu‘arrefetü’z-zât Serveti? Hanım bt. Mehmed Esad Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde zevci derûn-ı arzuhâlde mezkûrü’l-ism es-Seyyid Mahmud Efendi b. Abdullah muvâcehesinde mezbûr es-Seyyid Mahmud Efendi zimmetinde elli altı senesi şehr-i Rebî‘ülâhiri’nin on beşinci günü malımdan ve yedimden iktirâz ve kabz ve umûruna sarfla istihlâk eylediği yedi bin beş yüz guruş alacak hakkım olmağla meblağ-ı mezkûr yedi bin beş yüz guruşu mezbûr es-Seyyid Mahmud Efendi’den hâlâ taleb ederim deyü da‘vâ etdikde cevâbında müdde‘iyye-i mezbûre Serveti? Hanım’ın malından ancak dört bin altı yüz elli guruş kabzını ikrâr, ziyâde iki bin sekiz yüz elli guruş müdde‘âsını inkâr etmekle müdde‘iyye-i mezbûre ber-vech-i muharrer ziyâde müdde‘âsına ikāmet-i beyyine edemeyip bi’t-taleb mezbûre es-Seyyid Mahmud Efendi bi’l-muvâcehe ber-nehc-i şer‘î tahlîf olunmağın mûcebince müdde‘iyye-i mezbûre ziyâde iki bin sekiz yüz elli guruş müdde‘âsıyla zevci mezbûr es-Seyyid Mahmud Efendi’ye bilâ-beyyine mu‘ârazadan ba‘de’l-men‘ mezbûr es-Seyyid Mahmud Efendi’nin sâlifü’l-beyân ikrârıyla lâzım gelen meblağ-ı mezkûr dört bin altı yüz elli guruşun zevcesi müdde‘iyye-i mezbûre Serveti Hanım’a edâ ve teslîmiyle mezbûr es-Seyyid Mahmud Efendi ilzâm olunduğu huzûr-ı âlîlerine [i‘lâm olundu]. Fî 15 Ra sene [12]57.