Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 364 Hüküm no: 392 Orijinal metin no: [56b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarsus mahallesinden olup vefat eden Hasan b. Abdurrahman’ın vârisleri arasındaki davaya sulh bedeli karşılığı son verildiği Terekeden tehârüc tarîkiyle sulh ve ibrâ Mahmiye-i İslâmbol’da Tarsus mahallesi ahâlisinden olup bundan akdem hacc-ı şerîfden gelir iken esnâ-yı tarîkde Maan nâm mahâlde vefât eden el-Hâc Hasan b. Abdurrahman’ın verâseti zevce-i menkûha-i metrûkesi Âişe bt. Osman nâm hatun ile sulbiye kebîre kızları diğer Âişe ve Emine nâm hatunlara ve li-ebeveyn kız karındaşı Havva Hatun’a münhasıra ve mesele-i mîrâsları yirmi dört sehm i‘tibârıyla üç sehmi zevcesi mezbûre Âişe Hatun’a ve sekizer sehmden cem‘an on altı sehmi kızları mezbûretân diğer Âişe ve Emine hatunlara ve bâkī beş sehmi kız karındaşı mezbûre Havva Hatun’a isâbeti lede’ş-şer‘i’l-enver zâhir oldukdan sonra zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûre Havva Hatun meclis-i şer‘-i şerîf-i enverde işbu bâ‘isü’l-kitâb mezbûrât Âişe ve diğer Âişe ve Emine hatunlar taraflarından husûs-ı âti’l-beyânı tasdîka vekîl olduğu ber-nehc-i şer‘î sâbit olan mezbûre Âişe Hatun’un zevci İbrahim Beşe b. Mustafa nâm kimesne mahzarında bi’l-verâse ikrâr ve takrîr-i kelâm edip karındaşım mevrûsum müteveffâ-yı mezbûrun hîn-i vefâtında yanında mevcûd terekesini îsâle vasî nasb olunan Hafız el-Hâc Mehmed getirip müvekkilât-ı mezbûrâta teslîm etmekle bi’l-cümle tereke-i mevcûdesine müvekkilât-ı mezbûrât bi’l-verâse vâzı‘atü’l-yed olmalarıyla tereke-i müteveffât-ı mezbûrdan [57a] benim beş sehme isâbet eden hisse-i irsiyemi ben bu esnâda müvekkilât mezbûrâtdan taleb ve da‘vâya tesaddî etmişdim. El-hâletü hâzihî beynimize muslihûn tavassutuyla ber-vech-i muharrer tesaddî eylediğim da‘vâ-yı mezkûremden beni müvekkilât-ı mezbûrât Âişe ve diğer Âişe ve Emine hatunlar ile sıhhat-i sulh tehârüc-i mevcûde olduğu hâlde tereke-i müteveffâ-yı mezbûrdan ber-i‘tibâr-ı mezkûr benim beş sehm hissemden ezyed olan elli guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr elli guruşu yedlerinden tamamen ahz ü kabz ve istifâ-yı hak edip mûrisim müteveffâ-yı mezbûrun cüz’î ve küllî ism-i mâl ıtlâk olunur mecmû‘-ı terekesine ve hukūk-ı mîrâsa müte‘allika âmme-i de‘âvî ve kâffe-i mutâlebâtdan müvekkilât-ı mezbûrât Âişe ve diğer Âişe ve Emine hatunlar ile vasîyy-i mezbûr Hafız el-Hâc Mehmed’den her birinin zimmetlerini ibrâ-yı âmm-ı kātı‘u’n-nizâ‘la ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î. Fî 28 R sene 1197 Şühûdü’l-hâl: Mehmed Necib Efendi b. Seyyid Said, Mehmed Ağa b. Ömer, Hasan b. Derviş Mehmed, Ali b. İsmail, Ahmed b. Mustafa, Molla Ali b. Halil, Hasan Beşe b. Mustafa, Hasan b. Hüseyin, Ömer b. Mahmud ve gayruhum.