Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 365 Hüküm no: 393 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ördek Kasap mahallesinden Emetullah bt. İbrahim ile Ali Beşe’nin boşandıkları Muhâla‘a Mahmiye-i İslâmbol’da Ördek Kasab mahallesinde sâkine ve zâtı vech-i şer‘î üzere mu‘arrefe olan Emetullah bt. İbrahim nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Ali Beşe b. Abdullah nâm kimesne mahzarında ikrâr ve takrîr-i kelâm edip mezbûr Ali Beşe ile beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yirmi beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Ali Beşe ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve zevcim mezbûrdan matlûbum cihet-i karzdan sekiz guruşa müte‘allika âmme-i de‘âvî ve kâffe-i mutâlebâtdan ben zevcim mezbûr Ali Beşe’nin zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î. Fî 29 R sene 1197 Şühûdü’l-hâl: Es-Seyyid Derviş Süleyman b. Mehmed, Salih b. Halil, Molla Ali b. Halil, Hacı Hasan b. Osman.