Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 366 Hüküm no: 394 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Es-Seyyid İbrahim’in babasından miras kalan evin yarı hissesini Şerife Fatma Hatun’a sattığı Nısf menzil mübâya‘ası Mahmiye-i İslâmbol’da Yenibahçe kurbünde Karabaş mahallesinde sâkin iken bundan akdem vefât eden es-Seyyid Ahmed b. es-Seyyid İbrahim’in sulbî kebîr oğlu ve hasran vârisi es-Seyyid İbrahim nâm kimesne meclis-i şer‘-i şerîf-i enverde li-ebeveyn ammetesi kızı mu‘arrefetü’z-zât işbu bâ‘isetü’l-kitâb Şerife Fatıma bt. Mustafa nâm hatun mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Ali Ağa menzili ve bir tarafdan Berber Mehmed menzili ve bir tarafdan Serdengeçdi Ali Ağa menzili ve bir tarafdan tarîk-i âm ile mahdûd fevkānî iki oda ve bir sofa ve tahtânî bir bâb oda ve bir sofa ve bi’r-i mâ ve bir mikdâr bağçeyi müştemil bir bâb mülk menzil babam mûrisim müteveffâ-yı mezbûrun hayatında ile’l-vefât bâ-hüccet-i şer‘iye yedinde mülk ve hakkı olup ba‘de vefâtihî menzil-i mahdûd-ı mezkûr bana mevrûs olmağın ben menzil-i mahdûd-ı mezkûrun nısf-ı şâyi‘ini yedimde ibkā ve nısf-ı şâyi‘-i âharını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile mezbûre Şerife Fatıma Hatun’a yüz elli guruşa bey‘ ve temlik ve teslîm ve eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz elli guruş mutâlebesinden mezbûre Şerife Fatıma Hatun’un zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm menzil-i mahdûd-ı mezkûrun nısf-ı şâyi‘i mezbûre Şerife Fatıma Hatun’un mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 29 R sene 1197 Şühûdü’l-hâl: Mustafa b. el-Hâc Mehmed, es-Seyyid Ahmed b. Ali, Külâhî Mustafa Odabaşı, Arabacı Osman b. ( ), Arabacı Mustafa b. ( ), Molla Ali b. Halil, Salih b. Halil.