Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 238 Hüküm no: 192 Orijinal metin no: [53b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerbetçi Ali’nin oğlu Mehmed’in kazaen ölümü davasında sulh olduğu Ma‘rûz, Anadolu’da Gekbüze kazâsı mülhakātından Yoros nâhiyesine tâbi‘ Şile kasabası ahâlîsinden olup katîlen fevt olan on iki yaşında Mehmed nâm mürâhıkın babası Şerbetçi el-Hâc Ali b. Mehmed ile vâlidesi Hadice bt. Mehmed nâm Hatun’a inhisârı tahakkukundan sonra sâhibey-i arzuhâl mezbûrân el-Hâc Ali ile zâtı mu‘arrefe Hadice Hatun’dan her biri Salı günü huzûr-ı hazret-i fetvâ-penâhîde ma‘kūd meclis-i şer‘-i münîrde kātili derûn-ı arzuhâlde mezkûrü’l-ism tahmînen on iki yaşında diğer Mehmed nâm mürâhıkın babası ve velîsi Kalafatçı Mustafa b. Mehmed nâm kimesne muvâcehesinde mürâhık-ı mezbûr diğer Mehmed hâzır olduğu hâlde târîh-i i‘lâmdan bir buçuk ay mukaddem mûrisimiz oğlumuz müteveffâ-yı mezbûr Mehmed kasaba-i mezbûreden Çaylık Köprüsü Altbaşı nâm mahâlde mürâhık-ı hâzır-ı mezbûr diğer Mehmed ile bir mülâ‘abe eyledikleri hînde mürâhık-ı hâzır-ı mezbûr diğer Mehmed piştov saçması ile oğlumuz müteveffâ-yı merkūm Mehmed’in göbeğinden darb ü cerh etmekle oğlumuz ve mûrisimiz müteveffâ-yı mezbûr mürâhık-ı hâzır-ı mezbûr diğer Mehmed’in darb-ı mezkûrundan nâşî on sekiz sâ‘at mürûrunda müteessiren vefât etmekle mûcib-i şer‘îsini taleb ederiz deyü tasaddî eylediğimiz da‘vâmızdan bi’t-tav‘ ve’r-rızâ meccânen fâriğler olduğumuzda mezbûr Mustafa dahi bize malından teberru‘an bin beş yüz guruş def‘ ü teslîm ve umûrumuza sarfla istihlâka emir eylediğinde biz dahi ber-minvâl-i muharrer yedinden ahz u kabz ve emri üzere umûrumuza sarfla istihlâk edip bi’l-cümle husûs-ı mezkûra müte‘allika âmme-i da‘vâdan biz mürâhık-ı hâzır-ı mezbûr diğer Mehmed ile babası ve velîsi merkūm Mustafa’nın zimmetlerini bi’l-verâse mezbûr Mustafa dahi meblağ-ı müstehlek-i merkūmun istirdâdına müte‘allika âmme-i da‘vâdan bizim zimmetimizi bi’l-asâle her birimiz ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını asâleten ve velâyeten kabûl eyledik deyü ikrâr ve tasdîkleri tescîl ve huzûr-ı [âlîlerine i‘lâm olundu]. Fî 19 Ra sene [12]57.