Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 370 Hüküm no: 400 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahimpaşa mahallesinden Ziga Hatun’un Ahmed b. Mustafa’nın kendisine olan borcunu hibe edip öldükten sonra mallarını harcama konusunda da vasi tayin ettiği Mukaddemâ alacağının bir mikdârını hibe ba‘dehû vasiyet Mahmiye-i İslâmbol’da Silivrikapısı dâhilinde İbrahim Paşa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Ziga Hatun bt. el-Hâc Mehmed meclis-i şer‘-i şerîf-i enverde li-ebeveyn er karındaşı kızının sadrî kebîr oğlu işbu bâ‘isü’l-kitâb es-Seyyid Ahmed b. Mustafa nâm kimesne mahzarında ikrâr ve takrîr-i kelâm edip benim mezbûr es-Seyyid Ahmed zimmetinde cihet-i karzdan bâ-temessük üç yüz elli guruş alacak hakkımın yüz guruşunu hibetü’d-deyn mimmen aleyhi’d-deyn sahîhatün fehvâsınca mezbûr es-Seyyid Ahmed’e hibe ve temlik eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve kabûl etmeğin ol-vechile deyn-i meblağ-ı mezbûr üç yüz elli guruşun yüz guruşundan mezbûr es-Seyyid Ahmed’in zimmeti berî oldukdan sonra ben bi-emrillâhi te‘âlâ vefât eylediğimde mezbûr es-Seyyid Ahmed benim vasîyy-i muhtârım olup mecmû‘-ı tereke ve zimem-i nâsda olan hukūkumu bi’l-vesâye ahz ü kabz eyledikden sonra evvelâ vech-i mesnûn üzere techîz ve tekfîn ve sâir levâzım-ı defnim umûruna terekemden kırk guruş harc ü sarf edip bâkī kalan terekemin sülüsünü ifrâz ve sülüs-i mezbûrdan otuz guruşu ıskāt-ı salât-ı fâite ve keffârâtım içün fukarâ-i Müslimîn beyninde devr ü tasadduk eyleye ve sülüs-i mezbûrdan beş guruş ile iki aded taş iştirâ ve alâmet içün merkadimin baş ve ayak câniblerine vaz‘ etdire ve sülüs-i mezbûrdan her ne fazla kalır ise vasîyy-i mezbûr kendi re’yi üzere vücûh-ı birre harc ü sarf eyleye ve sülüsân-ı bâkıyemi dahi li-ebeveyn kız karındaşım Âişe Hatun ile âhar li-ebeveyn er karındaşım oğlu Mehmed b. Latif beynlerinde alâ mâ-farazallâhi te‘âlâ tevzî‘ ve taksîm eyleyeler deyü vasiyet ve tenfîzine mezbûr es-Seyyid Ahmed’i vasîyy-i muhtâr nasb ve ta‘yîn eyledim dedikde ol dahi ber-vech-i muharrer vesâyet-i mezkûreyi kabûl ve merâsimini kemâ-yenbagī edâya ta‘ahhüd ve iltizâm etmeğin mâ-vaka‘a bi’t-taleb. Fî 2 Ca sene 1197 Eş-şâhidûnü’s-sâbıkūn.