Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 371 Hüküm no: 401 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cafer Ağa mahallesinden Meftune bt. Abdullah’ın bahçe hakkının yarısını Samur bt. Abdullah’a sattığı Nısf bağçe mübâya‘ası Mahmiye-i İslâmbol’da Cafer Ağa mahallesinde sâkine ve zâtı vech-i şer‘î üzere mu‘arrefe olan Meftune bt. Abdullah nâm zenciye meclis-i şer‘-i şerîf-i enverde kezâlik mu‘arrefetü’z-zât işbu bâ‘isetü’l-kitâb Samur bt. Abdullah nâm zenciye mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Harameyn-i şerîfeyn vakfından menzil ve iki tarafdan Âişe Hatun menzili ve bir tarafdan üvey kızı Rabia Hatun tasarrufunda olan menzil ile mahdûd bir kıt‘a mülk bağçenin nısf-ı şâyi‘i müşteriye-i mezbûrenin ve nısf-ı şâyi‘-i âharı dahi benim yedimizde mülkümüz olmağın ben bağçe-i mahdûde-i mezkûrede ber-vech-i muharrer mâlike olduğum nısf hisse-i şayi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûre Samur Hatun’a elli guruşa bey‘ ve temlik ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr elli guruşu mezbûre Samur Hatun yedinden tamamen ahz ü kabz eyledim, ba‘de’l-yevm bağçe-i mahdûde-i mezkûrenin nısf-ı şâyi‘inde benim kat‘a alâka ve medhalim kalmayıp mezbûre Samur Hatun’un müstakıllen mülk-i müşterâsı ve hakk-ı sarfı olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb. Fî 3 Ca sene 1197 Şühûdü’l-hâl: Molla Ali b. Halil, Salih b. Halil, Molla Mehmed b. Mustafa, Mustafa b. Mustafa.