Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 371 Hüküm no: 402 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Simkeş mahallesinden Havva bt. Mustafa ile Süleyman b. Ahmed’in boşandıkları Muhâla‘a Mahmiye-i İslâmbol’da Mevlevîhâne Yenikapısı dâhilinde Sîmkeş mahallesinde sâkine ve zâtı ta‘rîf-i şer‘î ile mu‘arrefe olan Havva bt. Mustafa nâm hatun meclis-i şer‘-i hatîr-i lâzımü’t-tevkīrde zevc-i dâhili işbu bâ‘isü’l-kitâb Süleyman b. Ahmed nâm kimesne mahzarında ikrâr ve takrîr-i kelâm edip mezbûr Süleyman zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yirmi guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Süleyman ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan ben zevcim mezbûr Süleyman’ın zimmetini ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a bi’t-taleb. Fî 4 Ca sene 1197 Şühûdü’l-hâl: Es-Seyyid el-Hâc Osman b. el-Hâc Mehmed, İsmail b. Ahmed, Kalaycı Mahmud b. ( ), Molla Ali b. Halil, Mustafa b. Mustafa ve gayruhum.