Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 372 Hüküm no: 403 Orijinal metin no: [58b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Muslihiddin mahallesinden Abdurrahman Efendi’nin, öldükten sonra vasiyetini yerine getirmek üzere Hafız Mehmed Efendi’yi vasi tayin ettiği Husûs ile vasiyet Husûs-ı âti’l-beyânın mahâllinde ketb ü tahrîri iltimâs olmağın savb-ı şer‘-i enverden mezûnen irsâl olunan mevlana Hüseyin Efendi b. İbrahim mahmiye-i İslâmbol’da Altımermer kurbünde Kâtib Muslihiddin mahallesinde kâin Hafız Mehmed Efendi b. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî eyledikde menzil-i mezbûrda sâkin Abdurrahman Efendi b. el-Hâc Yunus meclis-i ma‘kūd-ı mezkûrda eniştesi işbu bâ‘isü’l-kitâb mezbûr Hafız Mehmed Efendi mahzarında ikrâr ve takrîr-i kelâm edip ben bi-emrillâhi te‘âlâ vefât eylediğimde mezbûr Hafız Mehmed Efendi benim vasîyy-i muhtârım olup mecmû‘-ı terekemi bi’l-vesâye ahz ü kabz eyledikden sonra evvelen vech-i mesnûn üzere techîz ve tekfîn ve sâir levâzım-ı defnim umûruna terekemden elli guruş harc u sarf eyleye ve medîne-i Halebü’ş-şehbâ’da sâkin el-Hâc İsmail Efendi nâm kimesneye cihet-i karzdan elli guruş deynimi îsâl ve teslîm edip bâkī kalan terekemin sülüsünü ifrâz ve sülüs-i mezbûrdan ıskāt-ı salât-ı fâitem içün elli guruş ve keffârât-ı yemîn ve savm ve sâir tezevvürât içün otuz guruş ki cem‘an seksen guruş fukarâ-i Müslimîn beyninde devr ve tasadduk eyleye ve sülüs-i mezbûrdan kırk guruş ile bir servi tabut iştirâ oluna ve sülüs-i mezbûrdan otuz guruş ile Mevlevîhâne Yenikapısı hâricinde kabrim hafr ve etrâfı taş örüle ve sülüs-i mezbûrdan mahalle imâmına on beş guruş verile ve on guruş müezzine verile ve sülüs-i mezbûrdan elli guruş fukarâya tasadduk oluna ve sülüs-i mezbûrdan otuzar guruşdan cem‘an altmış guruş hediyeli iki aded mushaf-ı şerîf iştirâ olunup talebe-i ulûmdan birer müstahık kimesneye verile ve sülüs-i mezbûrdan elli guruş ile tabh-ı ta‘âm ve it‘âm-ı fukarâ oluna ve sülüs-i mezbûrdan her ne fazla kalır ise vasîyy-i mezbûr Mehmed Efendi dilediği vücûh-ı hayra harc ü sarf eyleye ve sülüsân-ı bâkıyemi dahi li-ebeveyn kız karındaşım Nefise ve li-ebin er karındaşlarım Mehmed Ârif ve Mustafa beynlerinde alâ mâ-farazallâhi te‘âlâ tevzî‘ ve taksîm eyleyeler deyü vasiyet ve tenfîzine mezbûr Hafız Mehmed Efendi’yi vasîyy-i muhtâr nasb ve ta‘yîn eyledikde ol dahi ber-minvâl-i muharrer vesâyet-i mezkûreyi kabûl ve hizmet-i lâzımesin kemâ-yenbagī edâya ta‘ahhüd ve iltizâm eylediğini mevlana-yı mezbûr mahâllinde ketb ü tahrîr ve mâ‘an ba‘s olunan ümenâ-i şer‘le meclis-i şer‘a gelip alâ-vukū‘ıhî inhâ ve takrîr etmeğin mâ-vaka‘a bi’t-taleb Fî 3 Ca sene 1197 Şühûdü’l-hâl: Hafız es-Seyyid Ali Efendi b. es-Seyyid Mehmed imâm-ı mahalle-i mezbûre, Mustafa Efendi b. Hasan, Davudpaşa İmâmı Mustafa Efendi b. Mehmed, Müezzin el-Hâc Mehmed b. Mehmed, Süleyman Ağa b. Abdullah, Molla Ali b. Halil.