Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 373 Hüküm no: 404 Orijinal metin no: [58b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eyüb’te sâkin Mehmed Said Ağa’nın bazı eşyalarını sebepsiz yere alması sebebiyle Lanborlos v. İlya aleyhine açtığı davaya, sulh bedeli para karşılığında son verdiği Eşyâ da‘vâsından sulh ve ibrâ Medîne-i hazret-i Ebî Eyyûb Ensârî -radiye anhü rabbihü’l-bârî-’de sâkin Mehmed Said Ağa b. Mehmed meclis-i şer‘-i hatîr-i lâzımü’t-tevkīrde işbu hâmilü’r-rakīm Lanborlos v. İlya nâm zimmî tarafından husûs-ı âti’l-beyânda vekîl olduğu Foti v. Kaloyani ve Dimitri v. Nikola nâm zimmîler şehâdetleriyle şer‘an sâbit olan Verki v. Nikola nâm zimmî muvâcehesinde ikrâr-ı tam ve takrîr-i kelâm edip târih-i kitâbdan sekiz ay mukaddem vukū‘ bulan harîk-i kebîrde yedimde mâlım ve mülküm olan bir mukaffel sepet sandık derûnunda mevzû‘ mecmû‘u yedi yüz guruş kıymetli bürümcük ve hilâlî otuz kat câmeşûy ve on işleme havlu ve otuz işleme çevre ve yağlık ve bir dülbend örtüsü ve otuz işleme uçkur ve on işleme iş makramesi ve iki sofra ma‘a peşkir bez ve bürümcük on çârşeb ve sâir eşyâ-i mütenevvi‘a-i ma‘lûmemi müvekkil-i merkūm Lanborlos zimmî bî-garaz fuzûlî ahz etmekle eşyâ-i muharrer-i mezkûreyi ben bu esnâda müvekkil-i mesfûr Lanborlos zimmîden taleb ve da‘vâ sadedinde olduğumda ol dahi bi’l-külliye inkâr etmeğin bu vechile beynimizde münâza‘ât ve muhâsamât-ı şedîde cereyân etmiş idi. El-hâletü hâzihî beynimizde muslihûn tavassut edip tesaddî eylediğim da‘vâ-yı mezkûremden beni müvekkil-i mesfûr Lanborlos zimmî ile an-inkâr yüz kırk guruş üzerine inşâ-i akd-i sulh eylediklerinde ben dahi sulh-ı mezkûru kabûl ve bedel-i sulh olan meblağ-ı mezbûr yüz kırk guruşu müvekkil-i mesfûr Lanborlos zimmînin mâlından olmak üzere vekîl-i mesfûr Verki zimmîden tamamen ahz ü kabz edip eşyâ-i muharrere-i mezbûreye ve kıymet-i mezkûresine müte‘allika âmme-i de‘âvî ve kâffe-i mutâlebât ve eymân ve muhâsamâtdan müvekkil-i merkūm Lanborlos zimmînin zimmetini ibrâ-i âmm-ı kātı‘u’n-nizâ‘ ile ibrâ ve ıskāt eylediğimde vekîl-i mesfûr Verki zimmî dahi bedel-i sulh-ı mezkûr yüz kırk guruşa müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 4 Ca sene 1197 Şühûdü’l-hâl: Mehmed Sadık Ağa b. Ali, Mustafa Ağa b. Ali el-Hâc Mehmed b. Ali, es-Seyyid el-Hâc İsmail sîmkeş, Molla Ali b. Halil, Hacı Hasan b. Osman, Molla Mehmed b. Mustafa, Mustafa b. Mustafa.