Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 374 Hüküm no: 405 Orijinal metin no: [58b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ankara’nın Çorba kazası Hızır köyünden Keziban bt. Mahmud’un Hüseyin b. Yusuf’u vekil tayin etmesi İsbât-ı vekâlet Vilâyet-i Anadolu’da Ankara sancağında Çorba kazâsına tâbi‘ Hızır nâm karyede Sâkine Keziban bt. Mahmud b. Hüseyin nâm hatunun zevci ve tarafından ber-vech-i âtî vekâlet iddi‘â eden işbu bâ‘isü’l-kitâb es-Seyyid Hüseyin b. Yusuf nâm kimesne meclis-i şer‘-i şerîf-i enverde müvekkile-i mezbûrenin li-ebeveyn kız karındaşı mu‘arrefetü’z-zât Meryem Hatun mahzarında üzerine da‘vâ ve takrîr-i kelâm edip zevcem mezbûre kız karındaşı Meryem Hatun zimmetinde olan üç alaca entari ve bir alaca şalvar ve bir ibrik ve üç sahanı taleb ve da‘vâ ve ahz ü kabza ve mahmiye-i İslâmbol’da Koruk Mahmud mahallesinde vâki‘ taht-ı tasarrufunda olan bir bâb vakıf menzilden rub‘ hissesini bâ-ma‘rifet-i mütevellî bedel-i misli ile kız karındaşı mezbûre Meryem Hatun’a ferâğ ve tefvîze ve makbûzunu kendüye îsâl ve teslîme ve husûs-ı mezkûr mütevakkıf olduğu umûrun küllîsine beni tarafından vekîl ve nâib-i menâb nasb ve ta‘yîn eylediğinde ben dahi vekâlet-i mezbûreyi kabûl etmemle vekâlet-i mahkiyem hasebiyle eşyâ-i muharrere-i mezkûreyi mezbûre Meryem Hatun’dan taleb ederim, suâl olunsun dedikde ol dahi cevâbında eşyâ-i muharrere-i mezkûreye vaz‘-ı yedini ikrâr lâkin müdde‘î-i mezbûrun vekâletini inkâr edicek müdde‘î-i mezbûrdan müdde‘âsına mutâbıka beyyine taleb olundukda udûl-ı ahrâr-ı ricâl-i Müslimîn’den ve karye-i mezbûre ahâlisinden es-Seyyid Osman b. Mustafa ve Ahmed b. Hasan nâm kimesneler zât-ı mezbûreyi ârifân oldukları hâlde li-ecli’ş-şehâde meclis-i şer‘a hâzırân olup isre’l-istişhâd fi’l-hakīka vilâyet-i Anadolu’da Ankara sancağında Çorba kazâsına tâbi‘ Hızırlar nâm karyede sâkine Keziban bt. Mahmud b. Hüseyin nâm hatun li-ebeveyn kız karındaşı Meryem Hatun zimmetinde olan üç alaca entari ve bir alaca şalvar ve bir ibrik ve üç sahanı taleb ve da‘vâ ve ahz ü kabza ve mahmiye-i İslâmbol’da Koruk Mahmud mahallesinde kâin taht-ı tasarrufunda olan bir bâb vakıf menzilden rub‘ hissesini bâ-ma‘rifet-i mütevellî bedel-i misli ile kız karındaşı mezbûre Meryem Hatun’a ferâğ ve tefvîze ve makbûzunu kendüye îsâl ve teslîme ve husûs-ı mezkûr mütevakkıf olduğu umûrun küllîsine zevci işbu müdde‘î-i mezbûr es-Seyyid Hüseyin’i bizim huzûrumuzda vekîl ve nâib-i menâb nasb ve ta‘yîn eylediğinde [59a] ol dahi vekâlet-i mezbûreyi kabûl eyledi, biz bu husûsa bu vech üzere şâhidleriz deyü her biri edâ-i şehâdet-i şer‘iye etdiklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm ve’t-tenbîh mâ-vaka‘a bi’t-taleb. Fî 4 Ca sene 1197 Şühûdü’l-hâl: Es-Seyyid Osman b. Mustafa, Ahmed b. Hasan, Molla Ali b. Halil.