Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 375 Hüküm no: 406 Orijinal metin no: [59a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beyefendi’nin Hafız Paşa Mimar Sinan mahallesindeki yanmış olan berber dükkânı arsasındaki yarı hissesini Hüseyin Ağa’ya sattığı Nısf dükkân arsası mübâya‘ası Mahmiye-i İslâmbol’da Davudpaşa iskelesi Kasab İlyas mahallesinde sâkin Silahdâr Kalemi hulefâlarından umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam Mustafa Beyefendi b. Ahmed Efendi b. Mehmed tarafından husûs-ı âti’l-beyânı ikrâra vekîl olduğu Hüseyin Ağa b. Abdullah ve İbrahim Ağa b. Halil nâm kimesneler şehâdetleriyle şer‘an sâbit olan Mehmed Ağa b. İbrahim nâm kimesne meclis-i hatîr-i lâzımü’t-tevkīrde işbu bâ‘isü’l-kitâb Hüseyin Ağa b. Mustafa nâm kimesne mahzarında bi’l-vekâle ikrâr ve takrîr-i kelâm edip mahmiye-i mezbûrede Hafız Paşa Mi‘mâr Sinan mahallesinde vâki‘ bir tarafdan Camcı Halil arsası Mustafa Efendi veresesi arsası ve bir tarafdan müşterî-i mezbûrun arsası ve bir tarafdan tarîk-i âm ile mahdûd bir bâb muhterik mülk camcı dükkânı arsasının nısf-ı şâyi‘i mezbûr Camcı Halil’in ve nısf-ı şâyi‘-i âharı dahi müvekkilim mûmâ-ileyhin yedlerinde mülkleri olmağın müvekkil-i mûmâ-ileyh arsa-i mahdûde-i mezkûrede ber-vech-i muharrer mâlik olduğu nısf hisse-i şâyi‘asını tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Hüseyin Ağa’ya yüz guruşa bey‘ ve temlik ve teslîm eyledikden sonra ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz guruşu müvekkilim mûmâ-ileyh mezbûr Hüseyin Ağa yedinden tamamen ahz ü kabz eyledi, ba‘de’l-yevm arsa-i mahdûde-i mezkûrenin nısf-ı şâyi‘inde müvekkilim mûmâ-ileyh Mustafa Beyefendi’nin kat‘a alâka ve medhali kalmayıp mezbûr Hüseyin Ağa’nın mülk-i müşterâsı ve hakk-ı sarfı olmuşdur, gıbbe’t-tasdîki’ş-şer‘î mâ-vaka‘a bi’t-taleb. Fî 5 Ca sene 1197 Şühûdü’l-hâl: Hüseyin Ağa b. Abdullah, İbrahim Ağa b. Halil, Molla Ali b. Halil, Molla Mehmed b. Mustafa, Mustafa b. Mustafa.