Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 376 Hüküm no: 407 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa’nın Mimar Sinan mahallesindeki yanmış olan camcı dükkânı arsasını Hadice Hatun’a sattığı Yine nısf arsanın mübâya‘ası Mahmiye-i İslâmbol’da Hafız Paşa kurbünde Mi‘mâr Sinan mahallesinde sâkin Hüseyin Ağa b. Mustafa meclis-i şer‘-i hatîr-i lâzımü’t-tevkīrde hâlâ zevcesi işbu bâ‘isetü’l-kitâb Hadice Hatun bt. el-Hâc Mehmed tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan Ahmed b. Mehmed nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan Camcı Halil arsası ve bir tarafdan Mustafa Efendi veresesi arsası ve bir tarafdan benim âhar arsam ve bir tarafdan tarîk-i âm ile mahdûd bir bâb muhterik mülk camcı dükkânı arsasının nısf-ı şâyi‘i mezbûr Camcı Halil’in ve nısf-ı şâyi‘-i âharı dahi benim bâ-hüccet-i şer‘iye şirâen yedimizde mülkümüz olmağın ben arsa-i mahdûde-i mezkûrede ber-vech-i muharrer mâlik olduğum nısf hisse-i şayi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile zevce-i müvekkile-i mezbûre Hadice Hatun’a yüz guruşa bey‘ ve temlik ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz guruş mutâlebesinden zevce-i müvekkile-i mezbûrenin zimmetini ibrâ ve ıskāt eylediğimde ol dahi ibrâmı kabûl eyledi, ba‘de’l-yevm arsa-i mahdûde-i mezkûrenin nısf-ı şâyi‘inde benim kat‘a alâka ve medhalim kalmayıp zevce-i müvekkile-i mezbûre Hadice Hatun’un mülk-i müşterâsı ve hakk-ı sarfı olmuşdur dedikde gıbbet’t-tasdîki’ş-şer‘î. Fî 6 Ca sene 1197 Eş-şâhidûnü’s-sâbıkūn.