Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 239 Hüküm no: 193 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serveti Hanım’ın boşandığı eşinden nafaka talebi Medîne-i Üsküdar’a muzâfe Çengel karyesinde sâkine ve zâtı ta‘rîf-i şer‘î ile mu‘arrefe olan işbu bâ‘isetü’l-vesîka Serveti? Hanım bt. Mehmed Esad Bâb-ı hazret-i fetvâ-penâhîde Anadolu kazaskeri efendi hazretlerine mahsûs dâirede akdolunan meclis-i şer‘-i şerîf-i enverde zevc-i sâbıkı ketebeden es-Seyyid Mahmud Efendi b. Abdullah mahzarında takrîr-i kelâm ve ta‘bîr ani’l-merâm edip mezbûr es-Seyyid Mahmud Efendi ile mukaddemâ zevciyyet beynimizde kāime iken mezbûrun firâşından hâsıla ve benden mütevellide ve bi-hakkı’l-hıdâne hâlâ hacr ve terbiyemde olan sulbiye kızı üç yaşında Şerife Fâtıma nâm sagīrin aslâ malı olmayıp nafaka ve kisveye eşedd-i ihtiyâc ile muhtâce olmağla sagīre-i mezbûrenin nafakası için babası mezbûr üzerine kıbel-i şer‘den kadr-ı ma‘rûf meblağ farz ve takdîr olunmak bi’l-hıdâne matlûbumdur dedikde gıbbe’t-tasdîki’ş-şer‘î hâkim-i hâsim-i vâlâ-cenâb -vaffakallâhu te‘âlâ bi’s-sıdkı ve’s-savâb- efendi hazretleri dahi sagīre-i mezbûrenin nafakası için babası mezbûr es-Seyyid Mahmud Ağa üzerine işbu târîh-i vesîkadan beher şehr yüz yirmişer guruş kıbel-i şer‘den kadr-ı ma‘rûf meblağ farz ve takdîr buyurup meblağ-ı mefrûz-ı mezkûru sagīre-i mezbûrenin nafaka ve kisve vesâir levâzım-ı zarûriyesine harc u sarfa ve lede’l-iktizâ istidâneye ve inde’z-zafer babası mezbûr es-Seyyid Mahmud Efendi üzerine rücû‘a vâlidesi ve hâdinesi mezbûre Serveti Hatun’a izin vermeğin mâ-vaka‘a [bi’t-taleb ketb olundu]. Fî 15 Ra sene [12]57. Şuhûdü’l-hâl: Muhzır Salih Ağa b. Mehmed, Bâb-ı âlî gavvâslarından Mehmed gavvâs Mehmed Ağa b. Ali.