Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 380 Hüküm no: 413 Orijinal metin no: [59b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerâğî Hasan mahallesinde ölen Abraham v. Manil’in çocuklarına kalan yanmış ev hissesinin satılarak ücretinden çocuklara harcanması için vasisine izin verilmesi Vasîye menzili ferâğa izin Mahmiye-i İslâmbol’da Çerâğī Hasan mahallesinde mütemekkin iken bundan akdem hâlik olan Abraham v. Manil nâm zimmînin sulbî oğlu Manatisfan ve sulbiye kızı Gül nâm sagīrânın anaları ve tesviye-i umûrlarını rü’yete kıbel-i şer‘den bâ-hüccet-i şer‘iye vasîyy-i mansûbeleri mu‘arrefetü’ş-şahs işbu hâmilü’r-rakīm Antaran bt. Haçador nâm Nasrâniye meclis-i şer‘-i hatîr-i lâzımü’t-tevkīrde bi’l-vesâye takrîr-i kelâm ve bast-ı merâm edip merhûm İsa Bey nâm sâhibü’l-hayrın vakfından olup gallesi mahalle-i mezbûre câmi‘-i şerîfinde kayyım olanlara meşrûta ve mahalle-i mezbûrede vâki‘ ma‘lûmü’l-hudûd bir bâb muhterik vakıf menzil arsasının beş sehm [60a] i‘tibârıyla birer sehmden iki sehmi vasîleri olduğum sagīrân-ı mezbûrâna ve birer sehmden üç sehmi sulbî kebîr oğulları Manik ve Mardıros ve Kigork zimmîlerin babaları hâlik-i mesfûrdan müntakil bi’l-icâreteyn taht-ı tasarruflarında olup lâkin merkūmûn Manik ve Mardıros ve Kigork zimmîler arsa-i mahdûde-i mezkûrede olan hisselerini âhara ferâğ murâd etmeleriyle vasîleri olduğum sagīrân-ı mezbûrânın hisselerini ifrâz mümkün ve sagīrân-ı mezbûrânın mâlları dahi olmadığından gayrı arsa-i mahdûde-i mezkûreden intifâ‘ hâsıl olmayıp bekāsı sagīrân-ı mezbûrâna muzır olmağın sagīrân-ı mezbûrânın arsa-i mahdûde-i mezkûrede olan iki sehm şâyi‘leri merkūmûnun hisseleriyle bedel-i misli ve bâ-ma‘rifet-i mütevellî âhara ferâğ ve kabz-ı bedel ve bedeli istirbâh olunup hâsıl olan nemâsıyla sagīrân-ı mezbûrân infâk ve iksâ olunmak haklarında her vechile evlâ ve enfa‘ olduğuna binâen kıbel-i şer‘den bana izin verilmek bi’l-vesâye matlûbumdur dedikde hakīkat-i hâl vasîyy-i merkūmenin takrîr-i meşrûhası üzere olduğu zeyl-i sahîfede mektûbü’l-esâmî kimesneler ihbârlarıyla lede’ş-şer‘i’l-enver zâhir ve mütehakkık olmağın sagīrân-ı mezbûrânın arsa-i mezkûrede ber-vech-i muharrer mutasarrıf oldukları iki sehm şâyi‘leri merkūmûn Manik ve Mardıros ve Kigork zimmîlerin hisseleriyle mâ‘an bedel-i misli ile âhara ferâğa anaları mersûme Antara Nasrâniyeye kıbel-i şer‘den izin verilmeğin mâ-vaka‘a bi’t-taleb ketb olundu. Fî 6 Ca sene 1197 Şühûdü’l-hâl: Es-Seyyid Hasan b. Ali, Müezzin es-Seyyid Molla Osman b. Abdurrahman, Müezzin Molla Ahmed b. Mehmed, Kigork v. Haçador ve gayruhum.