Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 385 Hüküm no: 419 Orijinal metin no: [61a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hoca Üveys mahallesinden olup hac dönüşü vefat eden Ömer b. Süleyman’ın vârislerinin terekeden haklarını alarak birbirlerinin zimmetlerini ibra ettikleri Terekeden ve mehirden ibrâ Mahmiye-i İslâmbol’da Sarıgez kurbünde Hoca Üveys mahallesi ahâlisinden olup bundan akdem hacc-ı şerîfden gelir iken beyne’l-Haremeynü’ş-şerîfeyn vefât eden el-Hâc Ömer b. Süleyman’ın verâseti zevce-i menkûha-i metrûkesi Emetullah bt. Mehmed nâm hatun ile vâlidesi Emine bt. Abdullah nâm hatuna ve li-ebeveyn er karındaşları Mehmed Ârif ve Osman’a münhasıra ve mesele-i mîrâsları yirmi dört sehm i‘tibârıyla altı sehmi zevcesi mezbûre Emetullah Hatun’a ve dört sehmi vâlidesi mezbûre Emine Hatun’a ve yedişer sehmden cem‘an on dört sehmi karındaşları mezbûrân Mehmed Ârif ve Osman’a isâbeti tahakkukundan sonra zâtı ta‘rîf-i şer‘î ile mu‘arrefe olan zevce-i mezbûre Emetullah Hatun meclis-i şer‘-i hatîr-i lâzımü’t-tevkīrde işbu ashâbü’l-kitâb mezbûrûn Mehmed Ârif ve Osman ve zâtı kezâlik mu‘arrefe Emine Hatun mahzarlarından bi’l-verâse ikrâr ve takrîr-i kelâm edip zevcim mûrisim müteveffâ-yı mezbûr el-Hâc Ömer’in hîn-i hayatında mevcûde bi’l-cümle terekesi esmânından ba‘de ihrâci’l-mesârifi’l-lâzıme sahhu’l-bâkī benim i‘tibâr-ı mezkûr üzere dört sehmime isâbet eden on beş guruş hisse-i irsiyemi ve zevcim müteveffâ-yı mezbûrun zimmetinde ma‘kūdun-aleyh olan otuz üç guruş kırk akçe mehr-i müeccel hakkım ki cem‘an kırk sekiz guruş kırk akçeyi mezbûrûn Mehmed Ârif ve Osman ve Emine Hatun bana def‘ ve teslîm eylediklerinde ben dahi yedlerinden tamamen ahz ü kabz ve istifâ-yı hak edip zevcim mûrisim müteveffâ-yı mezbûrun cüz’î ve küllî terekesine ve hukūk-ı mîrâsa ve mehr-i müeccelime ve sâire müte‘allika âmme-i de‘âvî ve kâffe-i mutâlebâtdan mezbûrûn Mehmed Ârif ve Osman ve Emine Hatun’dan her birinin zimmetlerini ibrâ-i âm ile ibrâ ve ıskāt eylediğimde onlar dahi ibrâmı kabûl eylediler dedikde gıbbe’t-tasdîki’ş-şer‘î mâ-vaka‘a bi’t-taleb. Fî 11 Ca sene 1197 Şühûdü’l-hâl: Molla Ali b. Halil, Salih b. Halil, Hacı Hasan b. Osman, Mustafa b. Mustafa, Molla Mehmed b. Mustafa.