Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 386 Hüküm no: 420 Orijinal metin no: [61a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Ahmed’in yevmi elli akçelik esamesini Ahmed Ağa’ya sattığı Esâme kasr-ı yedi Mahmiye-i İslâmbol’da Kadırga Limanı kurbünde Bostânî Ali Ağa mahallesinde sâkin İbrahim b. Ahmed nâm kimesne meclis-i şer‘-i hatîr-i lâzımü’t-tevkīrde işbu bâ‘isü’l-kitâb Ahmed Ağa b. Osman nâm kimesne mahzarında ikrâr ve takrîr-i kelâm edip benim sipâh ocağında dördüncü bölükde İbrahim Ahmed nâm ismiyle mutasarrıf olduğum yevmî elli akçe esâmîmi bundan akdem hüsn-i rızâ ve ihtiyârımla mezbûr Ahmed Ağa’ya ferâğ ve bi’l-külliye kasr-ı yed ve ibtidâ ta‘bîr olunur tezkiresini dahi yedine teslîm eylediğimde ol dahi bedel-i ferâğ olmak üzere bana mâlından teberru‘an altı yüz guruş def‘ ü teslîm eyledikde ben dahi yedinden tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr Ahmed Ağa’nın zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezkûr altı yüz guruşa müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a. Fî 13 Ca sene 1197 Şühûdü’l-hâl: Mustafa Efendi b. Ahmed, Hüseyin Efendi b. Ali Buhûrîzâde Mehmed Efendi b. Ali Buhûrîzâde, Osman Ağa b. Mustafa, Hüseyin b. Ahmed, Molla Ali b. Halil, Mehmed Haşim b. Osman.