Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 386 Hüküm no: 421 Orijinal metin no: [61a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Bayram Kaftanı mahallesinden Ayşe bt. Mehmed ile Ömer b. Abdullah’ın boşandıkları Muhâla‘a Mahmiye-i İslâmbol’da Hacı Bayram Kaftanı mahallesinde sâkine ve zâtı vech-i şer‘î üzere mu‘arrefe olan Âişe bt. Mehmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Ömer b. Abdullah nâm kimesne mahzarında ikrâr ve takrîr-i kelâm edip mezbûr Ömer zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezkûrun zimmetinde mütekarrer ve ma‘kūdun-aleyh olan yirmi beş guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Ömer ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve zevcim mezbûrdan matlûbum cihet-i karzdan elli beş guruşa ve sâire müte‘allika âmme-i de‘âvî ve kâffe-i mutâlebâtdan ben zevcim mezbûr Ömer’in zimmetini ibrâ ve ıskāt eylediğimde ol dahi kezâlik hukūk-ı zevciyete ve sâire müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 13 min-Ca sene 1197 Şühûdü’l-hâl: İmâm Ali Efendi, Mehmed Sadık b. ( ), Salih b. Halil, Molla Ali b. Halil, Molla Mehmed b. Mustafa, diğer Salih b. ( ), Mustafa b. Mustafa.