Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 387 Hüküm no: 422 Orijinal metin no: [61a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Gürani mahallesindeki yanmış ev arsasının İbrahim b. Ali’ye ait olduğuna dair şahitler olduğu İstihbâr-ı arsa Mahmiye-i İslâmbol’da Molla Gürânî mahallesinde sâkin işbu bâ‘isü’l-kitâb es-Seyyid İbrahim b. Ali nâm kimesne meclis-i şer‘-i şerîf-i enverde takrîr-i kelâm ve bast-ı merâm edip mahalle-i mezbûrede vâki‘ bir tarafdan Ahmed Ağa arsası ve bir tarafdan Kethudâ Ahmed Ağa arsası ve bir tarafdan Okçu Abdurrahman Ağa arsası ve bir tarafdan tarîk-i âm ile mahdûd derûnunda bir bi’r-i mâ ve zikr olunan Mehmed Ağa tarafından müşterek taş duvar ve Okçu Abdurrahman Ağa tarafından müstakil taş duvar ve müştemilât-ı sâireyi hâvî bir bâb mülk menzil vâlidem olup mahalle-i mezbûrede sâkine iken bundan akdem vefât eden Şerife Hadice bt. el-Hâc Mehmed nâm hatundan müntakil mülk-i mevrûsum iken zikr olunan menzil ve yedimde olan mülknâme hüccetim bundan akdem vukū‘ bulan harîk-i kebîrde muhterik olmağla takrîrim vukūf-ı tammı olan bî-garaz Müslimînden ve istihbâr ve haberleri zabt ve tahrîr ve hüccet olunup yedime i‘tâ olunmak matlûbumdur dedikde hakīkat mukırr-ı mezbûr es-Seyyid İbrahim’in bâlâda bast ü beyân ve şerh ü ayân eylediği minvâl üzere olduğunu mahalle-i mezbûre ahâlisinden es-Seyyid Ahmed Efendi b. es-Seyyid İbrahim ve Çorbacı Osman Ağa b. Abdurrahman ve Mehmed Emin Ağa b. el-Hâc Mustafa nâm kimesnelerden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb. Fî 13 min-Ca sene 1197 Şühûdü’l-hâl: Es-Seyyid Ahmed Efendi b. es-Seyyid İbrahim, es-Seyyid Süleyman b. es-Seyyid İbrahim, es-Seyyid İbrahim b. es-Seyyid Ahmed, Çorbacı osman Ağa b. Abdurrahman, Mehmed Emin Ağa b. el-Hâc Mustafa, Hasan Ağa b. Abdi, Esir b. Osman, Molla Ali b. Halil ve gayruhum.