Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 388 Hüküm no: 423 Orijinal metin no: [61b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alifakih mahallesinden Emine bt. Mehmed’in oğluna Hüseyin bir gümüş saat hibe ettikten sonra bir kısım eşyayı da sattığı Eşyâ mübâya‘ası Mahmiye-i İslâmbol’da Ali Fakih mahallesinde sâkine ve zâtı vech-i şer‘î üzere mu‘arrefe olan Emine bt. Mehmed nâm hatun meclis-i şer‘-i şerîf-i enverde sadrî kebîr oğlunun oğlu işbu bâ‘isü’l-kitâb Hüseyin b. Ahmed Efendi mahzarında ikrâr ve takrîr-i kelâm edip yedimde mâlım olan bir sîm pandül sâ‘atimi hibe-i sahîha-i şer‘iye ile mezbûr Hüseyin’e hibe ve temlik ve teslîm eylediğimde ol dahi ber-vech-i muharrer meclis-i hibede bilâ-mâni‘ ittihâb ve temellük ve tesellüm ve kabz ve kabûl eyledikden sonra eşyâ-i memlûkemden bâ-defter-i müfredât yün memlû altı şayak yasdık ve üç minder ve bir döşek ma‘a şilte ve iki baş yasdığı ve bir orta keçesi ve bir kaliçe seccâde ve üç yemeni yorgan bâ-çârşeb ve üç döşek çârşebi ve bir sincab kürk ve bir çuka ferâce ve bir çiçekli entari ve on iki zirâ‘ ve bir destgâh ve bir çıkrık ve altı sahan ve üç kapak ve üç tencere ma‘a kapak ve iki kuzu lengerî ve iki şorba tası ma‘a kapak ve iki leğen ve bir ibrik ve iki tâbe sagīr ve kebîr iki sini ve bir tepsi ve bir güğüm ve bir kahve ibriği ve bir kahve tepsisi ma‘a fincan ve bir hamam tası ve bir mankāl ve iki bakraç tahta ve sepet üç sandık ve üç şamdanımı tarafeynden îcâb ve kabûlü [hâvî] bey‘i bâtt-ı sahîh-i şer‘î ve safka-i vâhide ile mezbûr Hüseyin’e otuz guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr otuz guruş mutâlebesinden mezbûr Hüseyin’in zimmetini ibrâ ve ıskāt eylediğimde ol dahi ibrâmı kabûl eyledi ba‘de’l-yevm zikr olunan sâ‘at mezbûr Hüseyin’in mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a. Fî 13 Ca sene 1197 Şühûdü’l-hâl: İsmail Efendi b. Mehmed imâm-ı mahalle-i mezbûre, Müezzin Hafız Mehmed Efendi b. Abdullah, es-Seyyid Mahmud Efendi b. İsmail, Kethudâ Hüseyin Çavuş Ağa b. Hasan, es-Seyyid İshak Bey b. Hamza, Berber İbrahim Ağa b. el-Hâc Salih, Mehmed Çavuş Ağa b. Ali, İsmail Ağa b. Mustafa, Molla Ali b. Halil.