Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 388 Hüküm no: 424 Orijinal metin no: [61b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiçihatun mahallesinden Mehmed Beyefendi’nin kız kardeşi Ayşe Hanım’a tasarrufundaki yanmış evin arsasının mülk kısmını satıp vakıf kısımlarını da ferağ ettiği Mülk arsa mübâya‘a ve vakıf arsayı bâ-ma‘rifet-i mütevellî ferâğ ve tefvîz Mahmiye-i İslâmbol’da Kiçihatun mahallesinde sâkin silahşor-i hazret-i şehriyârîden Mehmed Beyefendi b. el-merhûm Mollacıkzâde Ali Paşa meclis-i şer‘-i hatîr-i lâzımü’t-tevkīrde hemşîresi fahrü’l-muhadderât bâ‘isetü hâze’l-kitâbi’l-müstetâb Âişe Hanım bt. el-merhûm el-mezbûr Ali Paşa tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan Ahmed Ağa b. Süleyman mahzarında ikrâr ve takrîr-i kelâm edip mahmiye-i mezbûrede Davudpaşa mahallesinde vâki‘ bir tarafdan ba‘zan Mehmed Çavuş bağçesi ve ba‘zan es-Seyyid Ali Çavuş bağçesi ve bir tarafdan Ördekbaba Zâviyesi ve bir tarafdan ba‘zan Dîvân Efendisi Ali Efendi veresesi bağçesi ve ba‘zan el-Hâc Osman Çavuş arsası ve bir tarafdan tarîk-i âm ile mahdûd derûnunda iki bi’r-i mâ ve sâir enkāz-ı mevcûde-i ma‘lûmeyi müştemil bir bâb muhterik menzil arsasının zikr olunan Ördekbaba Zâviyesi tarafından yüz otuz yedi zirâ‘ mahâlli Haremeyn-i muhteremeyn Vakfı’ndan ve tarîk-i âm tarafından terbî‘an iki yüz zirâ‘ mahâlli mahalle-i mezbûre avârızına meşrûta vakıfdan ve iki yüz zirâ‘ mahâlli dahi mârrü’z-zikr Davudpaşa câmi‘-i şerîfinde imâm-ı evvel olanlara meşrûta vakıfdan olup bi’l-icâreteyn taht-ı tasarrufumda ve mâ‘adâ arsa ve enkāz-ı mevcûde-i ma‘lûmesi bâ-hüccet-i şer‘iye şirâen yedimde mülk ve hakkım olmağın ben arsa-i mahdûde-i mezkûrenin mülk olan mahâllini enkāz-ı mevcûdesiyle tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ile hemşîrem müvekkile-i mûmâ-ileyhâ Âişe Hanım’a bin beş yüz guruşa bey‘ ve temlik ve teslîm ve vakıf olan cem‘an beş yüz otuz yedi zirâ‘ mahallerini dahi iki yüz elli guruş bedel mukābelesinde mütevellîleri ma‘rifetleri ve ferâğ-ı mu‘teber-i kat‘î ile yine hemşîrem müvekkile-i mûmâ-ileyhâ Âişe Hanım’a ferâğ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semen-i mezkûr bin beş yüz guruş ile bedel-i merkūm iki yüz elli guruş ki cem‘an bin yedi yüz elli guruşu hemşîrem müvekkile-i mûmâ-ileyhâ Âişe Hanım yedinden tamamen ahz ü kabz eyledim, ba‘de’l-yevm arsa-i mahdûde-i mezkûrenin mülk olan mahâlli enkāz-ı mevcûdesiyle hemşîrem müvekkile-i mûmâ-ileyhâ Âişe Hanım’ın mülk-i müşterâsı ve vakıf olan mahalleri dahi bâ-ma‘rifet-i mütevellî dâhil-i havza-i tasarrufu olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb. Fî 13 min-Ca sene 1197 Şühûdü’l-hâl: eş-Şeyh Mehmed Said Efendi imâm-ı mahalle-i Başcı el-Hâc Mahmud, el-Hâc Emrullah Efendi b. Ali, İbrahim Ağa b. Mehmed, Bostânî el-Hâc Mustafa b. Mehmed, İbrahim Ağa başçukadâr.