Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 389 Hüküm no: 425 Orijinal metin no: [61b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun’un Nevbahar mahallesindeki yanmış ev arsasının kendine ait olduğuna dair şahitleri olması İstihbâr-ı arsa Mahmiye-i İslâmbol’da Şehremîni kurbünde Müneccim Sa‘di mahallesinde sâkine ve zâtı ta‘rîfi şer‘î ile mu‘arrefe olan işbu bâ‘isetü’l-vesîka Emine Hatun bt. el-Hâc Mustafa meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip mahmiye-i mezbûrede Nevbahar mahallesinde vâki‘ bir tarafdan Mühürdâr Mehmed Emin Efendi arsası ve ba‘zan Mahmud Ağa ve Münâdî Mehmed Ağa kerîmesi Fatıma Hatun arsaları ve ba‘zan Başcı el-Hâc Mahmud müezzi[n]lerine meşrûta vakıf arsa ve bir tarafdan Benefşe Ağasızâde Hasan Beşe arsası ve bir tarafdan Harameyn Vakfı’ndan benim tasarrufumda olan arsa ve bir tarafdan tarîk-i âm ile mahdûd terbî‘an altı yüz otuz üç zirâ‘ arsalı ma‘lûmü’l-müştemilât bir bâb mülk menzil bundan akdem vefât eden babam mezbûr el-Hâc Mustafa b. el-Hâc Ahmed’in hayatında ile’l-vefât yedinde mülk ve hakkı ve ba‘de vefâtihî menzil-i mahdûd-ı mezkûr bana mevrûs olup lâkin bundan akdem vâki‘ olan harîk-i kebîrde menzil-i mahdûd-ı mezkûr ve yedimde olan mülknâme hüccetim muhterik olmağla takrîrim vukūf-ı tammı olan bî-garaz Müslimînden suâl ve istihbâr ve haberleri zabt ü tahrîr ve hüccet olunup yedime i‘tâ olunmak matlûbumdur dedikde hakīkat-i hâl mukırre-i mezbûre Emine Hatun’un bâlâda bast ü beyân ve şerh ü ayân eylediği minvâl üzere olduğunu mahmiye-i mezbûrede Uzun Yusuf mahallesi ahâlisinden es-Seyyid İsmail Ağa b. es-Seyyid İbrahim ve Mustafa Ağa b. el-Hâc Ali ve Mustafa Efendi b. Osman ve İbrahim Ağa b. Hüseyin ve Veliyüddin Efendi b. Ahmed nâm kimesneler meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 5 min-Ca sene 1197 Şühûdü’l-hâl: Es-Seyyid İsmail Ağa b. es-Seyyid İbrahim, Mustafa Ağa b. el-Hâc Ali, Mustafa Efendi b. Osman, İbrahim b. Hüseyin, Veliyüddin Efendi b. Ahmed ve gayruhum.