Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 394 Hüküm no: 430 Orijinal metin no: [62b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasırcı mahallesinden Fatma bt. Mehmed ile İbrahim b. Mustafa’nın boşandıkları Muhâla‘a Mahmiye-i İslâmbol’da Mevlevîhâne Yenikapısı dâhilinde Hasırcı mahallesinde sâkine ve zâtı vech-i şer‘î üzere mu‘arrefe olan Fatıma bt. Mehmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb İbrahim b. Mustafa nâm kimesne mahzarında ikrâr ve takrîr-i kelâm edip mezbûr İbrahim zevcim olup lâkin beynimizde hüsn-i mu‘âşeretimiz olmayıp ben hul‘a tâlibe olduğum ecilden zevcim mezbûrun zimmetinde mütekarrer ve ma‘kūdun-aleyh olan yirmi guruş mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr İbrahim ile muhâla‘a-i sahîha-i şer‘iye ile hul‘ olduğumda ol dahi ber-vech-i muharrer hul‘-ı mezbûru ba‘de’l-kabûl hukūk-ı zevciyete ve sâire müte‘allika âmme-i de‘âvî ve kâffe-i mutâlebâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 16 min-Ca sene 1197 Şühûdü’l-hâl: Molla Ali b. Halil, Salih b. Halil, Mustafa b. Mustafa, Ali Ağa b. Mehmed, Hacı Hasan b. Osman.