Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 394 Hüküm no: 431 Orijinal metin no: [62b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kürkçübaşı mahallesinden Rukiye bt. Süleyman’ın kocasına olan borcuna karşılık evin bir kısım eşyasını satıp mehrinin de bir kısmını hibe ettiği Eşyâ mübâya‘ası ma‘a hibe ve semenini deyne takas Mahmiye-i İslâmbol’da Topkapısı dâhilinde Kürkçübaşı mahallesinde sâkine Rukiye bt. el-Hâc Süleyman nâm hatun tarafından husûs-ı âti’l-beyânı ikrâra vekîl olduğu zâtını ârifân Abdullah Odabaşı b. Mehmed ve Mehmed Beşe b. Ali nâm kimesneler şehâdetleriyle şer‘an sâbit olan imâm vekîli Mustafa Efendi b. Hüseyin meclis-i şer‘-i hatîr-i lâzımü’t-tevkīrde müvekkile-i mezbûrenin hâlâ zevci işbu bâ‘isü’l-kitâb es-Seyyid İbrahim b. es-Seyyid Halil nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Rukiye Hatun zevci mezbûr zimmetinde ma‘kūdun-aleyh olan otuz guruş mehr-i müeccelinin beş guruşunu zevci mezbûr zimmetinde ba‘de’l-ibkā mâ‘adâ yirmi beş guruşuyla yedinde mâlı olan zümrüd taşlı bir çift altın küpe ve on beş miskāl bir çift altın bileziğini hibe-i sahîha-i şer‘iye ile târih-i kitâbdan iki ay mukaddem zevci mezbûr es-Seyyid İbrahim’e hibe ve temlik ve teslîm eylediğinde ol dahi ber-vech-i muharrer meclis-i hibede bilâ-mâni‘ ittihâb ve temellük ve tesellüm ve kabz ve kabûl eyledikden sonra eşyâ-i memlûkesinden bâ-defter-i müfredât yün memlû altı beledî yasdık ve beş minder ve iki beledî döşek ve beş yemeni yorgan bâ-çârşeb ve üç baş yasdığı ve bir keçe ve bir kaliçe seccâde ve üç yemeni mak‘ad ve bir şilte ve dört Şam alacası entari ve bir sandal hırka ve bir şali cübbe ve iki tencere ma‘a kapak ve on bir sahan ma‘a kapak ve bir kazgan ve iki tas ma‘a kapak ve bir maşraba ve bir mankāl ve bir kebîr sini ve bir leğen ma‘a ibrik ve iki sepet sandığını dahi yine târih-i mezbûrda tarafeynden îcâb ve kabûlü hâvî bey‘-i bâtt-ı sahîh-i [63a] şer‘î ve safka-i vâhide ile zevci mezbûr es-Seyyid İbrahim’e doksan guruşa bey‘ ve temlik ve teslîm eyledikde ol dahi târih-i mezbûrede ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr doksan guruşu <> müvekkilem mezbûre Rukiye Hatun bundan akdem zevci mezbûr yedinden müstedân ve makbûz cihet-i karzdan doksan guruş deynine takas ve mahsûb eylediğinde ol dahi mukāssa ve kabûl etmeğin ol-vechile deyn-i meblağ-ı mezbûr doksan guruşdan târih-i mezbûrdan beri müvekkilem mezbûrenin zimmetini berî’e ve mehr-i mezkûr otuz guruşun yirmi beş guruşundan zevci mezbûr es-Seyyid İbrahim’in zimmeti berî ve zikr olunan altın küpe ve altın bilezik mülk-i mevhûbu ve eşyâ-i muharrere-i mezkûre dahi mülk-i müşterâsı ve hakk-ı sarfı olup müvekkilem mezbûre Rukiye Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mukırr-ı vekîl-i mezbûr Mustafa Efendi yine meclis-i şer‘de müvekkilenin zevci mezbûr es-Seyyid İbrahim mahzarında i‘âde-i kelâm edip müvekkilem mezbûre zevci mezbûr es-Seyyid İbrahim ile mahalle-i mezbûrede mâ‘an sâkin oldukları menzil derûnunda mevcûd bisât-ı beyt ve evân-ı nühâsiye ve gayr-ı nühâsiye ve bi’l-cümle eşyâ zevci mezbûr es-Seyyid İbrahim’in mâlı ve mülkü olup müvekkilem mezbûre Rukiye Hatun’un kat‘a alâka ve medhali yokdur dedikde mâ-vaka‘a bi’t-taleb ketb olundu. Fî 18 min-Ca sene 1197 Şühûdü’l-hâl: Kasab el-Hâc Hasan b. Mehmed, Kahveci Mustafa Beşe b. Ahmed, Abdullah Odabaşı b. Mehmed, Mehmed Beşe b. Ali, Hasan b. Ahmed, Molla Ali b. Halil, Hacı Hasan b. Osman ve gayruhum.