Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 396 Hüküm no: 432 Orijinal metin no: [63a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Emine adlı küçük kızın, babası İbrahim b. Mustafa’nın rızasıyla, boşanmış olduğu karısı Fatma Hatun’a verildiği Hakk-ı hıdâne sâkıta ve sagīre vâlidesi yanına ibkā Mahmiye-i İslâmbol’da ( ) mahallesinde sâkin es-Seyyid İbrahim b. Mustafa nâm kimesne tarafından vech-i âtî üzere vekîl olduğu es-Seyyid Halil b. Mustafa ve Ali Ağa b. Ahmed nâm kimesneler şehâdetleriyle şer‘an sâbit olan Mehmed Ağa b. Ömer nâm kimesne meclis-i şer‘-i şerîf-i enverde müvekkil-i mezbûrun zevce-i mutallakası mu‘arrefetü’z-zât işbu bâ‘isetü’l-kitâb Fatıma bt. Mustafa nâm hatun mahzarında bi’l-vekâle ikrâr ve takrîr-i kelâm edip müvekkilem mezbûr es-Seyyid İbrahim’in firâşından hâsıla ve mezbûre Fatıma Hatun’dan mütevellide sulbiye kızı Şerife Emine nâm sagīre-i mezbûre Fatıma Hatun’un hacr u terbiyesinde iken mezbûre târih-i kitâbdan iki sene mukaddem nefsini sagīre-i mezbûreye ecnebi? tezvîc etmekle hakk-ı hıdâne kendüden sâkıta olmuş idi. El-hâletü hâzihî müvekkilem mezbûr es-Seyyid İbrahim kızı sagīre-i mezbûreyi bi’r-rızâ vâlidesi mezbûre yanında terk ve ibkā ve mezbûre Fatıma Hatun dahi sagīre-i mezbûreyi kendi mâlından teberru‘an infâk ve iksâ edip müvekkilem mezbûr es-Seyyid İbrahim’den nafaka nâmına nesne mutâlebe etmemek üzere ta‘ahhüd eyledi dedikde mezbûr Fatıma Hatun dahi mukırr-ı vekîl-i mezbûr Mehmed Ağa’yı cemî‘ kelimât-ı meşrûhasında vicâhen ve şifâhen tahkīk ve tasdîk etmeğin mâ-vaka‘a bi’t-taleb. Fî 19 Ca sene 1197 Şühûdü’l-hâl: Es-Seyyid Mustafa b. İbrahim, es-Seyyid Halil b. Mustafa, Ali Ağa b. Ahmed, Molla Ali b. Halil.