Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 240 Hüküm no: 195 Orijinal metin no: [54a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eşi Mehmed Raşid’e itaat etmesi hususunda Rukiye bt. Mustafa’ya tenbihte bulunulması Ma‘rûz, Medîne-i Üsküdar’a muzâfe Gekbüze kazâsına mülhak Kartal kasabası ahâlîsinden Mehmed Raşid b. Hasan nâm kimesne Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde dayısı sâhib-i arzuhâl Hüseyin Ağa b. Mustafa nâm kimesne hâzır olduğu hâlde zevcesi derûn-ı arzuhâlde mezkûretü’l-ism mu‘arrefetü’z-zât Rukiye Hanım bt. Mustafa muvâcehesinde mezbûre Rukiye Hanım üç bin beş yüz guruş mehr-i müeccel-i müstevfâ ve bin beş yüz guruş mehr-i müeccel tesmiyeleriyle zevce-i menkûha-i medhûlün-bihâm olup lâkin bana itâ‘at ve hukūk-ı zevciyyete mürâ‘ât etmemekle suâl olunup kasaba-i mezkûrede vâki‘ mesken-i şer‘î olan menzilime gelip bana itâ‘at ve hukūk-ı zevciyyete mürâ‘ât etmek üzere zevcem mezbûre Rukiye Hanım’a tenbîh olunmak matlûbumdur deyü da‘vâ etdikde ol dahi cevâbında müdde‘î-i mezbûrun ol mikdâr guruş mehr-i mu‘accel-i müstevfâ ve bin beş yüz guruş mehr-i müeccel tesmiyeleriyle zevce-i menkûha-i medhûlün-bihâsı olduğunu ikrâr ü i‘tirâf etmeğin mûcebince zevci müdde‘î-i mezbûrun kasaba-i merkūmede vâki‘ mesken-i şer‘î olan menzil-i mezkûruna gidip zevci merkūma itâ‘at ve hukūk-ı zevciyyete murâ‘ât etmek üzere mezbûre Rukiye Hanım’a tenbîh olunduğu huzûr-ı âlîlerine i‘lâm olundu. Fî 17 Ra sene [12]57.