Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 241 Hüküm no: 196 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcunu ödemesi hususunda Mehmed Efendi’ye tenbihte bulunulması Ma‘rûz, Bâ-işâret-i aliyye sâdır olan fermân-ı âlîlerine imtisâlen sarrâf tâifesinden İstanbul’da Büyük Yeni Han’da mütemekkin arzuhâl eden Sarıoğlu Agob v. Kirkor nâm zimmî yedine Üsküdar mahkemesinde mahalle-i şer‘-i hatîrde derûn-ı arzuhâlde mezkûrü’l-ism medîne-i mezbûrede Süleyman Ağa mahallesinde sâkin nüvvâbdan es-Seyyid el-Hâc Hafız Mehmed Efendi b. Süleyman muvâcehesinde ben mezbûr es-Seyyid el-Hâc Hafız Mehmed Efendi’nin bin iki yüz elli bir senesinden beri sarrâflık hizmetinde olmam takrîbiyle müddet-i ma‘lûmede gerek mezbûr es-Seyyid el-Hâc Hafız Mehmed Efendi’ye bi’d-defa‘ât malımdan iktirâz ve teslîm eylediğim ve kezâlik bi-şartı’r-rücû‘ emriyle mahâll-i ma‘lûmeye malımdan medfû‘âtım olan mebâliğ-i ma‘lûmenin hesâbını iki yüz elli altı senesi Muharremi’l-harâmı’nın yirmi sekizinci günü hân-ı mezkûrda mütemekkin olduğu odada mezbûr ile bi’d-defa‘ât yegān yegān sahîhan rü’yet eylediğimizde gayr-ı ez teslîmat benim mezbûr es-Seyyid el-Hâc Hafız Mehmed Efendi zimmetinde yirmi altı bin on guruş hakkım zuhûr eylediğinde mezbûr es-Seyyid el-Hâc Hafız Mehmed Efendi meblağ-ı mezkûr zimmetinde sahîhan bana deyni olduğunu tâyi‘an ikrâr ve târîh-i mezkûr ile müverrah mührüyle memhûr işbu bir kıt‘a deyn tahvîlini yedime i‘tâ etmekle meblağ-ı mezkûr yirmi altı bin on guruşu merkūm es-Seyyid el-Hâc Hafız Mehmed Efendi’den hâlâ taleb ederim deyü da‘vâ etdikde ol dahi cevâbında inkâr etmekle müdde‘î-i mersûm ber-vech-i muharrer müdde‘âsıyla beyâna ba‘de’l-havâle mezbûr es-Seyyid el-Hâc Hafız Mehmed Efendi dönüp ben fi’l-hakīka mersûm Agob zimmî ile ber-vech-i muharrer beynimizde cârî ahz ü i‘tâmızın hesâbını rü’yet eylediğimiz hînde zimmî-yi mersûmun zimmetimde meblağ-ı mezkûr yirmi altı bin on guruş alacak hakkı zuhûr edip ben dahi meblağ-ı mezkûr mersûm Agob zimmîye zimmetimde sahîhan deynim olduğunu [54b] ikrâr ve temessük-i mezkûru yedine i‘tâ etmiş idim. Lâkin ber-minvâl-i vech-i meşrûh hesâbımız rü’yet olundukdan sonra benim zimmî-yi mersûma medfû‘atım var ise de mikdârı ma‘lûm olmayıp zannıma göre zimmî-yi mersûm meblağ-ı mezkûrun yirmi bin guruşa rü’yet mikdârını istîfâ etmiş olmağla öyle olucak mersûm Agob zimmî meblağ-ı mezkûrun ancak yedi bin yâhud sekiz bin guruşuyla beni mutâlebe eylesin deyü takrîr-i meşrûhu üzere îrâd eylediği kelâmı def‘a sâlih cevâb-ı şer‘î olmayıp mezbûr es-Seyyid el-Hâc Hafız Mehmed Efendi’ye ba‘de’t-tefhîm sâlifü’z-zikr ikrârı mûcebince meblağ-ı mezkûr yirmi altı bin on guruşu müdde‘î-i mezbûr Agob zimmîye edâya mezbûr es-Seyyid el-Hâc Hafız Mehmed’e tenbîh olunduğu huzûr-ı [âlîlerine i‘lâm olundu]. Fî 15 Ra sene [12]57.