Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 399 Hüküm no: 438 Orijinal metin no: [63b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancı Mehmed Sadık’ın yevmi on dört akçe olan esamisini Hasan b. Mehmed’e ferağı Esâme kasr-ı yedi Mahmiye-i İslâmbol’da Mi‘mâr Acem mahallesinde sâkin Bostânî Mehmed Sadık b. Süleyman nâm kimesne meclis-i şer‘-i şerîf-i enverde işbu bâ‘isü’l-kitâb Hasan b. Mehmed nâm kimesne mahzarında ikrâr ve takrîr-i kelâm edip benim Silahdâr Ocağı’nda otuz üçüncü bölükde Mehmed nâm ismiyle mutasarrıf olduğumuz yevmî on dört akçe esâmîmi bundan akdem hüsn-i rızâ ve ihtiyârımla mezbûr Hasan’a ferâğ ve bi’l-külliye kasr-ı yed ve ibtidâ ta‘bîr olunur tezkiresini dahi yedine teslîm eylediğimde ol dahi bedel-i ferâğ üzere bana mâlından teberru‘an yüz on dokuz guruş def‘ ü teslîm eylediğimde ben dahi yedinden tamamen ahz ü kabz ve umûruma sarfla istihlâk eylediğimden sonra ben esâmî-i mezkûra müte‘allika âmme-i de‘âvî ve kâffe-i mutâlebâtdan mezbûr Hasan’ın zimmetini ibrâ ve ıskāt eylediğimde ol dahi bedel-i ferâğ nâmıyla bana medfû‘u olan meblağ-ı müstehlek-i mezkûr yüz on dokuz guruşa müte‘allika âmme-i de‘âvîden benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’l-mu‘teberi’l-mer‘î mâ-vaka‘a. Fî 22 Ca sene 1197 Şühûdü’l-hâl: Osman Çavuş Ağa b. ( ), diğer Osman Çavuş Ağa b. Mehmed Bey, Mehmed Çavuş Ağa b. ( ), Hüseyin Çavuş Ağa b. ( ), Ali Bey b. ( ), Molla Ali b. Halil ve gayruhum.