Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 400 Hüküm no: 439 Orijinal metin no: [63b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Altımermer mahallesinde Salih Ağa’dan boşanmış olan Ayşe bt. Hüseyin’in mehrini aldığı Tatlîk ve ibrâ Mahmiye-i İslâmbol’da Altımermer kurbünde Kâtib Muslihiddin mahallesinde sâkine ve zâtı vech-i şer‘î üzere mu‘arrefe olan Âişe bt. Hüseyin nâm hatun meclis-i şer‘-i şerîf-i enverde zevc-i mutallıkı işbu bâ‘isü’l-kitâb Salih Ağa b. Abdullah nâm kimesne mahzarında ikrâr ve takrîr-i kelâm edip mezbûr Salih Ağa zevc-i dâhilim olduğu hâlde târih-i kitâbdan bir gün mukaddem beni bâyinen tatlîk etmekle zimmetinde ma‘kūdun-aleyh olan iki def‘a akdim müsemmâ beş mehr-i müeccel hakkım ile nafaka-i iddet-i mu‘ayyene ve meûnet-i süknâm içün bi’t-terâzî beynimizde ta‘yîn olunan beş guruş ki cem‘an on guruşu zevc-i mutallıkım mezbûr Salih Ağa bana def‘ ve teslîm eyledikde ben dahi yedinden tamamen ahz ü kabz edip hukūk-ı zevciyete ve mukaddemâ hîn-i akidde mehr-i mu‘accel tesmiye olunup matlûbum olan bir döşek ve bir çârşeb ve bir yorgan ve bir baş yasdığına müte‘allika âmme-i de‘âvî ve kâffe-i mutâlebâtdan ben zevc-i mutallıkım âmme-i da‘vâdan benim zimmetimi ibrâ ve ıskāt eylediğimde ol dahi kezâlik hukūk-ı zevciyete müte‘allika âmme-i da‘vâdan benim zimmetimi ibrâ ve ıskāt edip her birimiz ber-minvâl-i muharrer âharın ibrâsını kabûl eyledik dedikde gıbbe’t-tasdîki’ş-şer‘î mâ-vaka‘a. Fî 22 Cemâziyelevvel sene 1197 Şühûdü’l-hâl: Molla Ali b. Halil, Salih b. Halil, Mustafa b. Mustafa, Hacı Hasan b. Osman, Molla Mehmed b. Mustafa.