Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 401 Hüküm no: 440 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Hadice Hatun’un Sinanpaşa-yı cedid mahallesindeki evini Hasan Ağa’ya sattığı Menzil mübâya‘ası Mahmiye-i İslâmbol’da İskender Ağa mahallesinde sâkine ve zâtı ta‘rîf-i şer‘î ile mu‘arrefe olan Şerife Hadice Hatun bt. Abdurrahman meclis-i şer‘-i hatîr-i lâzımü’t-tevkīrde işbu bâ‘isü’l-kitâb Hasan Ağa b. Şaban nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahrûse-i Galata’ya muzâfe Beşiktaş kasabası mahallâtından Sinanpaşa-yı cedîd mahallesinde vâki‘ bir tarafdan Hüseyin Ağa menzili ve bir tarafdan Kayıkçı Halil Beşe menzili ve bir tarafdan Kolancı Mehmed Beşe menzili ve bir tarafdan tarîk-i hâs ile mahdûd fevkānî bir bâb oda ve sofa ve âbdesthâne ve tahtânî bir bâb oda ve bir sofa ve matbah ve kömürlük ve kenîf ve bir mikdâr havluyu müştemil bir bâb mülk menzilimi bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî ve şurût-ı müfside ve muvâza‘adan ârî bey‘-i bâtt-ı sahîh-i şer‘î ile mezbûr Hasan Ağa’ya seksen guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr seksen guruşu mezbûr Hasan Ağa yedinden tamamen ahz ü kabz eyledim, ba‘de’l-yevm menzil-i mahdûd-ı mezkûr cemî‘ müştemilâtıyla mezbûr Hasan Ağa’nın mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 23 Ca sene 1197 Şühûdü’l-hâl: Hüseyin Ağa b. Şaban, es-Seyyid Receb b. es-Seyyid Ali, Kolancı Mehmed Beşe b. Hüseyin, el-Hâc Hasan b. Osman, Sinanpaşa İmâmı Hüseyin Efendi, Hüseyin b. Ali, Molla Ali b. Halil, Halil Beşe b. ( ).