Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 401 Hüküm no: 441 Orijinal metin no: [64a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Mahmud’un Arabacı Bayezid mahallesinde bulunan evin kendi hissesini Mehmed Emin Beşe’ye sattığı Arsadan hisse mübâya‘ası Mahmiye-i İslâmbol’da Arabacı Bâyezid mahallesinde sâkin Derviş Mahmud b. Halil meclis-i şer‘-i şerîf-i enverde işbu bâ‘isü’l-kitâb Mehmed Emin Beşe b. İbrahim nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan İbrahim menzili ve bir tarafdan Bağçevân Mustafa menzili ve bir tarafdan bostan ve bir tarafdan tarîk-i hâs ile mahdûd bir bâb mülk menzil arsasının sekiz sehm i‘tibârıyla iki sehmi müşterî-i mezbûr Mehmed Emin Beşe’nin ve iki sehmi Mustafa Beşe’nin birer sehmden üç sehmi Ali ve Fatıma ve Âişe hatunların ve bir sehmi benim yedimizde mülk ve hakkımız olmağın ben arsa-i mahdûde-i mezkûrede ber-vech-i muharrer mâlik olduğum bir sehm hisse-i şâyi‘amı tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed Emin Beşe’ye on guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr on guruşu mezbûr Mehmed Emin Beşe yedinden tamamen ahz ü kabz eyledim, ba‘de’l-yevm arsa-i mahdûde-i mezkûrenin bir sehminde benim kat‘a alâka ve medhalim kalmayıp iki sehmi irsen ve bir sehmi şirâen mezbûr Mehmed Emin Beşe’nin mülk-i sahîh ve hakk-ı sarîhi olmuşdur dedikde gıbbe’t-tasdîki’ş-şer‘î mâ-vaka‘a bi’t-taleb. Fî 23 Ca sene 1197 Şühûdü’l-hâl: İbrahim b. İsmail, İsmail Ağa b. Mehmed, Mehmed Ağa b. Mustafa, Molla Ali b. Halil.