Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 403 Hüküm no: 443 Orijinal metin no: [64a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Atik Ali Paşa mahallesinden Hediyetullah Hanım’ın yanmış ev arsasını Mehmed Arif Efendi’ye sattığı Arsa mübâya‘ası Mahmiye-i İslâmbol’da Edirnekapısı dâhilinde Atik Ali Paşa mahallesinde sâkin iken bundan akdem vefât eden Ahmed Ağa b. İsmail’in verâseti sulbiye kebîre kızı Âişe Hatun’a münhasıra ba‘dehû mezbûre Âişe Hatun dahi fevt olup verâseti ancak sadriye kebîre kızı Hediyetullah Hanım bt. Abdurrahman Ağa’ya münhasıra oldukdan sonra zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan mezbûre Hediyetullah Hanım meclis-i şer‘-i hatîr-i lâzımü’t-tevkīrde işbu bâ‘isü’l-kitâb Mehmed Ârif Efendi b. Salih tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan Halil Beşe b. Osman nâm kimesne mahzarında ikrâr ve takrîr-i kelâm edip mahalle-i mezbûrede vâki‘ bir tarafdan el-Hâc Hüseyin Vakfı’ndan müşterî-i mezbûr tasarrufunda olan arsa ve bir tarafdan Hadice Sultan Vakfı’ndan bakkāl dükkânı ve iki tarafdan tarîk-i âm ile mahdûd derûnunda bir bi’r-i mâ ve etrâf-ı erba‘adan taş duvarı müştemil terbî‘an üç yüz üç zirâ‘ bir bâb muhterik mülk menzil arsası mûrisim müteveffâ-yı evvel mezbûr Ahmed Ağa’nın hayatında ile’l-vefât yedinde mülk ve hakkı olup ba‘de vefâtihimâ arsa-i mahdûde-i mezkûre bana mevrûs olmağın ben arsa-i mahdûde-i mezkûreyi tarafeynden îcâb ve kabûlü hâvî bey‘-i bâtt-ı sahîh-i şer‘î ile müvekkil-i mezbûr Mehmed Ârif Efendi’ye yüz seksen guruşa bey‘ ve temlik ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yüz seksen guruşu müvekkil-i mezbûr Mehmed Ârif Efendi yedinden tamamen ahz ü kabz eyledim, ba‘de’l-yevm arsa-i mahdûde-i mezkûre müvekkil-i mezbûr Mehmed Ârif Efendi’nin mülk-i müşterâsı ve hakk-ı sarfı olup benim kat‘a alâka ve medhalim kalmamışdır dedikde gıbbe’t-tasdîki’ş-şer‘î. Fî 13 Ca sene 1197 Şühûdü’l-hâl: İmâm Ebûbekir Efendi b. Yunus, İmâm Hüseyin Efendi b. Hasan, es-Seyyid Halil b. es-Seyyid Mehmed, Yusuf Ağa b. Mustafa, Çörekçi Osman b. Ali, Kapı Kethudâsı Mehmed Ağa b. Ali, Doğramacı es-Seyyid Mehmed Ağa b. Abdullah.