Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 403 Hüküm no: 444 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hobyar mahallesinde içinde mülkname hücceti ile birlikte yanan evin Mehmed Ağa’ya ait olduğuna dair şahitler olduğu İstihbâr-ı arsa Mahmiye-i İslâmbol’da Avratpazarı kurbünde Hobyar mahallesinde sâkine <> işbu bâ‘isü’l-kitâb Mehmed Ağa b. Hasan nâm kimesne meclis-i şer‘-i şerîf-i enverde takrîr-i kelâm ve bast-ı merâm edip mahalle-i mezbûrede vâki‘ bir tarafdan Hamâmî Seyfi Ağa arsası ve bir tarafdan Tatar İbrahim Ağa arsası ve bir tarafdan Mehter Halil Ağa arsası ve bir tarafdan tarîk-i âm ile mahdûd derûnunda bir müşterek bi’r-i mâ ve müştemilât-ı sâire ve terbî‘an iki yüz kırk zirâ‘ arsalı bir bâb mülk menzil Fatıma Hatun’dan beş yüz guruş semen-i medfû‘a müşterâ otuz dört seneden beri yedimde mülk ve hakkım iken menzil-i mahdûd-ı mezkûr ile yedimde olan mülknâme hüccetim bundan akdem vukū‘ bulan harîk-i kebîrde muhterik olmağla takrîrim vukūf-ı tammı olan bî-garaz Müslimîn’den suâl ve istihbâr ve haberleri zabt ve tahrîr ve hüccet olunup yedime i‘tâ olunmak matlûbumdur dedikde hakīkat-i hâl mukırr-ı mezbûr Mehmed Ağa’nın bâlâda bast ü beyân ve şerh ü ayân eylediği minvâl üzere olduğunu mahalle-i mezbûre ahâlisinden el-Hâc Osman Efendi b. el-Hâc Salih ve el-Hâc Halil Ağa b. Ahmed ve el-Hâc Ali Ağa b. Abdullah ve Hasan Ağa b. Abdullah nâm kimesnelerden her biri meclis-i şer‘de alâ-tarîki’ş-şehâde haber vermeleriyle vâki‘ü’l-hâl hıfzen li’l-makāl bi’t-taleb ketb olundu. Fî 24 min-Ca sene 1197 Şühûdü’l-hâl: el-Hâc Osman Efendi b. el-Hâc Salih, el-Hâc Halil Ağa b. Ahmed, el-Hâc Ali Ağa b. Abdullah, Hasan Ağa b. Abdullah, Molla Ali b. Halil.