Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 404 Hüküm no: 445 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühani bt. Mustafa’nın Mehmed Ağa’ya yanmış olan dükkânlara ait enkazın kendi hissesini satıp vakfa ait arsasını da meccanen ferağ ettiği Mukāta‘alı arsa derûnunda enkāz mübâya‘ası Mahmiye-i İslâmbol’da Samatya kapısı dâhilinde el-Hâc Hüseyin mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe olan Ümmühani bt. el-Hâc Mustafa nâm hatun meclis-i şer‘-i şerîf-i enverde işbu bâ‘isü’l-kitâb es-Seyyid el-Hâc Mehmed Ağa b. es-Seyyid Ömer tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan Abdülkerim Ağa b. el-Hâc Mehmed mahzarında ikrâr-ı tam ve takrîr-i kelâm edip mahalle-i mezbûrede vâki‘ bir tarafdan kenîse ve üç tarafdan tarîk-i âm ile mahdûd, arsaları Ayasofya-i kebîr Vakfı’na senevî yetmiş ikişer akçeden cem‘an üç yüz altmış akçe mukāta‘a-i kadîmeli biri helvacı ve biri sebzeci ve biri pazarcı ve biri balıkçı ve biri kasab ve üzerlerinde birer bâb odalı birbirine muttasıl beş bâb muhterik dükkân arsalarının derûnlarında mevcûde enkāz-ı ma‘lûmesinin yüz kırk sekiz sehm i‘tibârıyla yüz on dört sehm-i şâyi‘leri vekîl-i mezbûr Abdülhalim Ağa’nın ve otuz dört sehm-i şâyi‘leri benim yedimizde mülk ve hakkımız olmağın ben zikr olunan arsalar derûnlarında mevcûde olan enkāz-ı ma‘lûmeden i‘tibâr-ı mezkûr üzere mâlike olduğum otuz dört hisse-i şâyi‘alarımı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkil-i mezbûr es-Seyyid el-Hâc Mehmed Ağa’ya altı yüz yetmiş guruşa bey‘ ve temlik ve teslîm ve arsalarını dahi bâ-ma‘rifet-i mütevellî meccânen ferâğ ve tefvîz eylediğimde ol dahi ber-vech-i muharrer iştirâ ve temellük ve tesellüm ve tefevvüz ve kabûl eyledikden sonra semeni olan meblağ-ı mezbûr altı yüz yetmiş guruşu müvekkil-i mezbûr es-Seyyid el-Hâc Mehmed Ağa yedinden tamamen ahz ü kabz eyledim ba‘de’l-yevm zikr olunan arsalar derûnlarında mevcûde enkāz-ı ma‘lûmenin otuz dört sehm-i şâyi‘lerinde benim kat‘a alâka ve medhalim kalmayıp müvekkil-i mezbûr es-Seyyid el-Hâc Mehmed Ağa’nın mülk ve hakk-ı sarfı ve arsalar dahi ber-i‘tibâr-ı mezkûr dâhil-i havza-i tasarrufu olmuşdur dedikde gıbbe’t-tasdîki’ş-şer‘î mâ-vaka‘a. Fî 25 Ca sene 1197 Şühûdü’l-hâl: Şerif Süleyman b. es-Seyyid el-Hâc Mehmed, el-Hâc Hüseyin Ağa b. Mustafa kethudâ-yı helvacıyân, el-Hâc Mustafa b. Süleyman helvacı, el-Hâc Veliyüddin b. Mustafa, Hafız Ahmed b. Mehmed, Molla Ali b. Halil, Manav Musa Beşe b. Ahmed, es-Seyyid Ömer b. Ali, es-Seyyid Osman b. Ali.