Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 405 Hüküm no: 446 Orijinal metin no: [64b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beyceğiz Hoca Kasım mahallesinden Fatma bt. Hüseyin’in bir kısım eşyalarını üvey oğlu Ali Beşe’ye sattığı ve beraber kaldıkları evdeki eşyalar ile de kendisinin alakası olmadığına dair ikrarı Eşyâ mübâya‘ası ma‘a nefy-i mülk Mahmiye-i İslâmbol’da Beyceğiz Hoca Kasım mahallesinde sâkine Fatıma bt. Hüseyin nâm hatun tarafından husûs-ı âti’l-beyânı ikrâra vekîl olduğu zâtını ârifân Ahmed Efendi b. el-Hâc Hamza ve Hasan Efendi b. Ahmed şehâdetleriyle şer‘an sâbit olan mahalle-i mezbûre müezzini İsmail Efendi b. Hüseyin meclis-i şer‘-i şerîf-i enverde müvekkile-i mezbûrenin üvey oğlu işbu bâ‘isü’l-kitâb es-Seyyid Ali Beşe b. Ahmed nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Fatıma Hatun eşyâ-i memlûkesinden altı köhne çit yasdık ve üç minder ve bir döşek ve iki köhne beylik ve bir yorgan ve iki Şam alacası entari ve bir çuka ferâce ve bir keremsûd hırka ve iki bez gömlek ve bir sini ve bir leğen ve bir tencere ma‘a kapak ve bir tasını tarafeynden îcâb ve kabûlü hâvî bey‘-i bâtt-ı sahîh-i şer‘î ve safka-i vâhide ile mezbûr es-Seyyid Ali Beşe’ye yirmi guruşa bey‘ ve temlik ve teslîm eylediğinde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yirmi guruş mutâlebesinden müvekkilem mezbûre Fatıma Hatun mezbûr es-Seyyid Ali Beşe’nin zimmetini ibrâ ve ıskāt eylediğinde ol dahi ibrâsını kabûl eyledi, ba‘de’l-yevm eşyâ-i muharrere-i mezkûre mezbûr es-Seyyid Ali Beşe’nin mülk-i müşterâsı ve hakk-ı sarfı olup müvekkilem mezbûre Fatıma Hatun’un kat‘a alâka ve medhali kalmamışdır dedikde gıbbe’t-tasdîki’ş-şer‘î mukırr-ı vekîl-i mezbûr İsmail Efendi yine meclis-i şer‘de müvekkile-i mezbûrenin üvey oğlu mezbûr es-Seyyid Ali Beşe mahzarında i‘âde-i kelâm edip müvekkilem mezbûre Fatıma Hatun mezbûr es-Seyyid Ali Beşe ile mahalle-i mezbûrede vâki‘ mâ‘an sâkin oldukları menzilde mevcûd bisât-ı beyt ve evân-ı nühâsiye ve gayr-ı nühâsiye ve bi’l-cümle eşyâ mezbûr es-Seyyid Ali Beşe’nin mâlı ve mülkü olup müvekkilem mezbûre Fatıma Hatun’un kat‘a alâka ve medhali yokdur dedikde mâ-vaka‘a bi’t-taleb ketb olundu. Fî 25 min-Cumâdelûlâ sene 1197 Şühûdü’l-hâl: İmâm el-Hâc Mehmed Efendi b. Hüseyin, es-Seyyid Mehmed Ağa b. Ömer, el-Hâc Hüseyin Ağa b. Ali, Ahmed Efendi b. el-Hâc Hamza, Hasan Efendi b. Ahmed, İbrahim Beşe b. Yahya ve gayruhum.