Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 406 Hüküm no: 447 Orijinal metin no: [65a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şekerci Yusuf’un Bayezid Camii yakınındaki şekerci dükkânında bulunan gedik tabir olunur eşyanın kendi hissesini Ahmed Ağa’ya sattığı Şekerci gediği mübâya‘ası Mahmiye-i İslâmbol’da Kâtib Sinan mahallesinde sâkin Şekerci Yusuf Usta b. Abdullah nâm kimesne tarafından husûs-ı âti’l-beyânı ikrâra vekîl olduğu Mustafa b. Süleyman ve Mehmed Salih b. Abdullah nâm kimesneler şehâdetleriyle şer‘an sâbit olan Mahmud Ağa b. Ahmed nâm kimesne meclis-i şer‘-i şerîf-i enverde işbu bâ‘isü’l-kitâb Ahmed Ağa b. Süleyman nâm kimesne mahzarında bi’l-vekâle ikrâr-ı tam ve takrîr-i kelâm edip mahmiye-i mezbûrede Sultan Bâyezid Câmi‘-i şerîfi kurbünde kâin Hasan Paşa Hanı karşısında vâki‘ ma‘lûmü’l-hudûd üç kepenk bir bâb şekerci dükkânı derûnunda mevcûd beyne’l-hıref gedik ta‘bîr olunur iki mermer taş ve altı tas ve on iki kâse ve sagīr ve kebîr altı tencere ve üç tepsi ve yüz şişe ve yirmi kutu ve sekiz terâzî ma‘a derâhim ve sekiz mikrâs ve on beş mühür ve sekiz tabla ve sâir âlât-ı lâzıme-i ma‘lûmenin nısf-ı şâyi‘i müşterî-i mezbûrun ve nısf-ı şâyi‘-i âharı dahi müvekkilim mezbûr Yusuf Usta’nın bâ-hüccet-i şer‘iye şirâen yedlerinde mülk ve hakları olmağın müvekkilim mezbûr Yusuf Usta mârrü’z-zikr gedik ta‘bîr olunan eşyâ-i muharrere-i mezkûre ve sâir âlât-ı lâzıme-i ma‘lûmede ber-vech-i muharrer mâlik olduğu nısf hisse-i şâyi‘asını bin yüz doksan altı senesi Şevvâli’l-mükerreminin üçüncü günü tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr Ahmed Ağa’ya yedi yüz guruşa bey‘ ve temlik ve teslîm eylediğinde ol dahi târih-i mezbûrda ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr yedi yüz guruşu müvekkilim mezbûr Yusuf Usta mezbûr Ahmed Ağa yedinden tamamen ahz ü kabz edip mebî‘-i mezkûrun gabn ve tağrîrine müte‘allika âmme-i de‘âvîden müvekkilim mezbûr Yusuf Usta mezbûr Ahmed Ağa’nın zimmetini ibrâ ve ıskāt eylediğinde ol dahi ibrâsını kabûl etmeğin ol-vechile mârrü’z-zikr gedik ta‘bîr olunan eşyâ-i muharrere-i mezkûra ve sâir âlât-ı lâzıme-i ma‘lûmenin nısf-ı şâyi‘i târih-i mezbûrdan beri mezbûr Ahmed Ağa’nın müstakıllen mülk-i müşterâsı ve hakk-ı sarfı olup müvekkilim mezbûr Yusuf Usta’nın kat‘a alâka ve medhali kalmamışdır dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fî 26 min-Cumâdelûlâ sene 1197 Şühûdü’l-hâl: Ahmed Ağa b. Mustafa kethudâ, Ahmed Usta b. Ömer yiğitbaşı, Koca Mustafa Paşalı Hüseyin Usta b. Mahmud, Dikilitaşlı Ali b. Mustafa, Sultan Mehmedli el-Hâc Mustafa b. Mehmed, Tahtakal‘alı İbrahim b. Halil, Mütevellî Molla Osman b. Ahmed, Osmaniyeli Ahmed Usta b. Hamza, Sîmkeşhâneli Mustafa b. Süleyman, Mahmudpaşalı Mustafa Usta, Mehmed Salih b. Abdullah, el-Hâc Musa b. ( ), Molla Ali b. Halil.