Anadolu Sadâreti Mahkemesi 2 Numaralı Sicil (H. 1251-1257/ M. 1835-1841) cilt: 94, sayfa: 242 Hüküm no: 197 Orijinal metin no: [54b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borçlarını ödemeleri hususunda Kömürcü Ohannes ve ortağı Kirhor’a tenbihte bulunulması Ma‘rûz, Medîne-i Üsküdar’da Ali Selami Efendi mahallesi mütemekkinlerinden İstanbul’da Vâlide Hanı sarrâflarından arzuhâl eden Artin v. Haçadur nâm zimmî Bâb-ı hazret-i fetvâ-penâhîde Anadolu mutasarrıfları dâ‘îlerine tahsîs buyurulan dâirede ma‘kūd meclis-i şer‘-i münîrde derûn-ı arzuhâlde isimleri mastûr Katolik milleti patriki kapı oğlanı er karındaşı Kömürcü Ohannes v. Mosis zimmî muvâcehesinde mersûm Ohannes zimmînin mukaddemâ şerîki Kirhor v. Bedros zimmî hâzır olduğu hâlde mesfûr Ohannes zimmî zimmetinde bin iki yüz elli üç senesi Recebi’l-ferdi gurresi günü târîhiyle müverrah bir kıt‘a temessük nâtık olduğu üzere hâzır-ı mersûmun kefâletiyle malımdan ve yedinden iktirâz ve kabz ve umûruna sarfla istihlâk eylediği sekiz bin yedi yüz seksen beş guruş ve hâzır-ı mersûm Kirhor zimmî zimmetinde dahi yine târîh-i mezkûr ile müverrah diğer bir kıt‘a temessük mantûkunca mersûm Ohannes zimmî kefâletiyle kezâlik malımdan iktirâz ve kabz ve umûruna sarfla istihlâk eylediği on dört bin yüz on beş guruş ki cem‘an yirmi üç bin guruş alacak hakkım olmağla meblağ-ı mecmû‘-ı mezkûru mersûm Ohannes zimmî ile hâzır-ı mersûm Kirhor zimmîlerden hâlâ taleb ederim deyü da‘vâ etdikde mersûm Ohannes zimmî ile hâzır-ı mersûmdan her biri cevâblarında meblağ-ı mecmû‘-ı merkūm yirmi üç bin guruşu müdde‘î-i mersûma ber-minvâl-i muharrer cihet-i mezkûreden zimmetlerinden deynleri olduğunu ikrâr, lâkin müdde‘î-i mersûm Artin zimmî bin iki yüz elli beş senesi Saferi’l-hayrı’nın on yedinci günü meblağ-ı mecmû‘-ı mezkûr yirmi üç bin guruşu mahrûse-i Galata’da Beyoğlu nâm mahâlde Tatavlalı Ahmed’in berber dükkânında benden mutâlebe ve muslihûn tavassutuyla beynimiz te’lîf olunup meblağ-ı mecmû‘-ı mezkûr yirmi üç bin guruş mutâlebesinden rızâsıyla altı bin beş yüz guruş bedel-i medfû‘ ve makbûza sulh olduğunda ben dahi kabûl ve ziyâdesi olan on altı bin beş yüz guruş mutâlebesine müte‘allika da‘vâdan benim ve hâzır-ı mersûmun zimmetlerimizi kabûlü hâvî ibrâ ve iskāt etmiş idi deyü hâzır-ı mersûmun tasdîkiyle ba‘de’d-def‘ ve’l-inkâr dâfi‘-i mesfûr Ohannes zimmî ber-vech-i muharrer def‘ine ikāmet-i beyyine edemeyip tahlîfe dahi tâlib olmamağla mûcebince mersûm Ohannes zimmî ile hâzır-ı mersûm Kirhor zimmî’den her biri def‘-i mezkûrlarıyla mersûm Artin zimmîye bilâ-beyyine mu‘ârazadan ba‘de’l-men‘ mersûm Ohannes ve hâzır-ı mersûm Kirhor zimmîlerin ikrâr ve i‘tirâflarıyla lâzım gelen meblağ-ı mecmû‘-ı merkūm yirmi üç bin guruşu mersûm Artin zimmîye ber-minvâl-i meşrûh edâ ve teslîme mesfûr Ohannes zimmî ile hâzır-ı mersûm Kirhor zimmîlerden herbirine tenbîh olunduğu huzûr-ı âlîlerine i‘lâm olundu. Fî 12 Ra sene [12]57.