Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 410 Hüküm no: 453 Orijinal metin no: [65b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa’nın Balat’ın Anzavur sokağındaki mahzeni Liyazar ve Avram’a müştereken kiraladığı Kezâlik mahzen-i mezbûru îcâr ve istîcâr Mahmiye-i İslâmbol’da Balat kapısı dâhilinde sâkin Halil Beşe b. Osman nâm kimesne meclis-i şer‘-i şerîf-i enverde işbu bâ‘isü’r-rakīm kendi nefsinden asîl ve eniştesi Liyazar v. ( ) nâm Yahûdî tarafından husûs-ı âti’l-beyânı tasdîka vekîl olduğu nehc-i şer‘î ve tarîk-i mer‘î üzere sâbit olan Avram v. Yako nâm Yahûdî muvâcehesinde ikrâr ve takrîr-i kelâm edip mârrü’z-zikr Balat kapısı dâhilinde kâin Aznavur sokağında vâki‘ İbrahim Hanoğlu Vakfı’ndan işbu hâzır bi’l-meclis İbrahim Ağa b. el-Hâc Mustafa’nın emr ve tevkîliyle târih-i kitâbdan beher şehir sekiz guruş ücret tesmiyesiyle mesfûrân Liyazar ve Avram Yahûdîlere ale’l-iştirâki’s-seviyy îcâr ve teslîm eylediğimde merkūm Avram Yahûdî dahi ber-vech-i muharrer bi’l-asâle ve bi’l-vekâle istîcâr ve tesellüm ve kabûl ve ücret-i müsemmâ-yı mezkûreyi beher mâh tamamında bi’l-asâle ve bi’l-vekâle bana edâya ve ba‘de’l-yevm zikr olunan mahzenin iktizâ eden ta‘mîr ve termîmine mâllarından her ne masrafları olur ise vakfa teberru‘ olmak üzere ta‘ahhüd eyledi dediğini mezbûr İbrahim Ağa ile merkūm Avram Yahûdî’den her biri bi’l-asâle ve bi’l-vekâle tasdîk etmeğin mâ-vaka‘a bi’t-taleb ketb olundu. Fî 27 min-Ca sene 1197 Şâhidûn-ı sâbıkūn.