Davud Paşa Mahkemesi 1 Numaralı Sicil (H. 1196-1197 / M. 1782-1783) cilt: 79, sayfa: 411 Hüküm no: 454 Orijinal metin no: [65b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uzun Yusuf mahallesinden Mustafa Beşe’nin evini önce vakıf mütevellisi Ahmed Hamid Bey’e satıp sonra vakıftan kiraladığı Mülk menzili vakfa mübâya‘a ba‘dehû îcâr ve istîcâr Mahmiye-i İslâmbol’da Uzun Yusuf mahallesinde sâkin Mustafa Beşe b. Süleyman nâm kimesne meclis-i şer‘-i şerîf-i enverde el-Hâc Osman Ağa nâm sâhibü’l-hayrın mahalle-i mezbûre câmi‘-i şerîfinde mevzû‘ kürsi ve cihât-ı sâire vakfının ber-vech-i meşrûta mütevellîsi işbu ba‘isü’l-kitâb Ahmed Hamid Bey b. Ahmed Bey mahzarında ikrâr ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye şirâen yedimde mülk ve hakkım olup mahalle-i mezbûrede vâki‘ bir tarafdan Haremeyn-i şerîfeyn Vakfı’ndan Mehmed Efendi tasarrufunda olan menzil ve bir tarafdan Hadice Hatun tasarrufunda olan menzil ve bir tarafdan tarîk-i hâs ve bir tarafdan tarîk-i âm ile mahdûd terbî‘an yüz elli dört zirâ‘ arsa üzerinde mebnî fevkānî bir bâb oda ve tahtında bir matbah ve kenîf ve bi’r-i mâ ve bir mikdâr bağçeyi müştemil bir bâb mülk menzili cümle-i tevâbi‘ ve levâhıkıyla tarafeynden îcâb ve kabûlü hâvî bey‘-i bâtt-ı sahîh-i şer‘î ile vakf-ı merkūm içün mütevellî-i mezbûr Ahmed Hamid Bey’e yüz otuz beş guruşa bey‘ ve teslîm eylediğimde ol dahi ber-vech-i muharrer bi’t-tevliye iştirâ ve tesellüm ve kabûl eyledikden sonra semeni olan meblağ-ı mezbûr yüz otuz beş guruşun kırk beş guruşunu vakf-ı mezbûrdan olmak üzere mütevellî-i mezbûr yedinden ahz ü kabz ve mâ‘adâ doksan guruşunu ibkā edip menzil-i mahdûd-ı mezkûr vakf-ı merkūm müsakkafâtından oldukdan sonra mütevellî-i mezbûr Ahmed Hamid Bey bi’t-tevliye yedime i‘tâ eylediği bir kıt‘a temessük mantûkunca menzil-i mahdûd-ı mezkûru doksan guruş icâre-i mu‘accele ve yevmî nısf akçe icâre-i müeccele ile îcâr ve teslîm ve semen-i mezkûrdan ibkā eylediğim doksan guruşu, mu‘accele-i merkūme doksan [66a] guruşa mahsûb ve takas eylediğinde ben dahi ber-vech-i muharrer istîcâr ve tesellüm ve mukāssa ve kabûl edip mebî‘-i mezkûrun gabn ve tağrîrine ve mu‘accele-i merkūme adem-i istifâsına müte‘allika âmme-i de‘âvîden cânib-i vakf-ı merkūm ile zimmet-i mütevellî-i mezbûru ibrâ ve ıskāt eylediğimde ol dahi ibrâmı kabûl eyledi dedikde gıbbe’t-tasdîki’ş-şer‘î mâ-vaka‘a. Fî ( ) min-Ca sene 1197 Şühûdü’l-hâl: Es-Seyyid el-Hâc Zeynelabidin Efendi b. es-Seyyid Halil Efendi, İmâm vekîli Ali Efendi b. Mehmed, Müezzin Halil Efendi b. Mustafa, eş-Şeyh Mehmed Emin Efendi b. İsmail, Hasan Efendi b. Abdünnebi, İsmail Ağa b. el-Hâc Yusuf, Mehmed Emin Ağa b. Musa, el-Hâc Ali Ağa b. el-Hâc Yusuf, Mehmed Said Ağa b. Ali, Mehmed Esad Bey b. Ahmed Bey, Mehmed Şakir Ağa b. el-Hâc İbrahim, Sâbıkā Kantar Emîni Za‘îm Halil Ağa b. Mehmed, Molla Ali b. Halil.